QR Prezidenti Qasym-Jomart Toqaev ánshi Roza Baǵlanovanyń esimin máńgi saqtaý úshin sharalar qabyldaýdy tapsyrdy, dep habarlaidy QazAqparat. Bul týraly Memleket basshysy Twitter-degi paraqshasynda jazdy.
«2022 jyldyń 1 qańtarynda qazaqtyń bulbul ánshisi Roza Baǵlanovanyń týǵanyna 100 jyl tolady. Ol – Qazaqstannyń jáne KSRO-nyń halyq ártisi, Qazaqstannyń Halyq qaharmany.
Maidan dalasynda án salǵan R.Baǵlanova qazirgi kúnge deiin elimizdegi jáne sheteldegi án súier qaýym arasynda keńinen tanymal. Onyń esimin máńgi saqtaý úshin sharalar qabyldaýdy tapsyrdym», delingen habarlamada.
Roza Tájibaiqyzy Baǵlanova ánshi, Qazaqstannyń (1955) jáne burynǵy KSRO halyq artisi (1967), Halyq qaharmany (1996). Qyzylorda oblysynyń Qazaly qalasynda 1922 jyly birinshi qańtarda týǵan. 1941 jyly Qyzylorda pedagogikalyq institýtyn bitirgen. Óner jolyn Tashkent filarmoniiasynyń án-bi ansamblinde ánshi bolyp bastaǵan. Sol ansamblmen 2-dúniejúzilik soǵys jyldary maidan dalasynda óner kórsetip, 1945 jyly toǵyzynshy mamyrda Berlindegi jeńis kontsertine qatysady. 1947 - 1949 jyldary Qazaq opera jáne balet teatrynyń, 1949 - 1960 jyldary Qazaq filarmoniiasynyń, 1960 jyldan Qazaqkontserttiń ánshisi bolyp, ulttyq án ónerin damytýǵa úlken úles qosty, erekshe sazdy ánshilik mekteptiń qalyptasýyna yqpal jasady. Roza Baǵlanova qazaqtyń halyq ánderin, zamandas kompozitorlar ánderin, shet el halyqtarynyń (vengr, ózbek, qyrǵyz, tájik, ýkrain, grýzin, ázerbaijan, korei, qytai, mońǵol, orys, úndi, cheh, shved, t.b.) ánderin naqyshyna keltire oryndady. 1946 jyly Máskeýde ótken búkilodaqtyq estrada ánshileri 2-konkýrsynyń diplomaty, 1949 jyly Býhareste ótken búkil dúniejúzilik Jastar men stýdentterdiń 2-festivaliniń laýreaty. Lenin, Eńbek Qyzyl Tý, «Halyqtar dostyǵy» ordenderimen, «Shapaǵat» medalimen marapattalǵan. Roza Baǵlanova sirek talantty ánshi, álem halyqtary ánderin sheber oryndaýshy.
Ol búkil Qazaqstanda, KSRO-nyń burynǵy respýblikalarynda, shetelderde bolyp, Otan, mahabbat pen dostyq, adam men tabiǵat týraly ánderdi shyrqady. Gastroldik saparǵa shyǵarda R. Baǵlanova mindetti túrde sol baratyn eliniń tilindegi ándi úirenedi. Biraq, qazaqtyń halyq ánderin onyń oryndaýynda tyńdaý lázzatyna eshteńe teń kelmeidi.
Roza Baǵlanova 2011 jyly qańtardyń 8-inde Almaty qalasynda dúnieden ótti. Ánshiniń oryndaýyndaǵy Abaidyń «Jelsiz túnde jaryq ai», kompozitor M. Tólebaevtyń aqyn óleńine jazǵan «Qaqtaǵan aq kúmistei keń mańdaily», S. Muhamedjanovtyń «Jarq etpes qara kóńlim ne qylsa da», «Qiystyryp maqtaisyz» ánderi Qazaq radiosy fonotekasynda saqtaýly, onyń oryndaýyndaǵy ánder birneshe ret kúitabaqqa jazylyp, qazaq mýzyka mádenietiniń altyn qoryna qosyldy.
