Foto: Aqorda
Memleket basshysy Qasym-Jomart Toqaev «2024 jylǵy 6 qazanda respýblikalyq referendým ótkizý týraly» Jarlyqqa qol qoidy. Bul týraly Aqordanyń resmi saity málimdedi.
«Qazaqstan Respýblikasy Konstitýtsiiasynyń 44-babynyń 10) tarmaqshasyna jáne „Respýblikalyq referendým týraly“ Qazaqstan Respýblikasy Konstitýtsiialyq zańynyń 18-babyna sáikes Qaýly etemin:
1. 2024 jylǵy 6 qazanda respýblikalyq referendým ótkizilsin.
2. Respýblikalyq referendýmǵa: «Siz Qazaqstanda atom elektr stantsiiasyn salýǵa kelisesiz be?» degen saýal shyǵarylsyn.
3. Osy Jarlyq 2024 jylǵy 3 qyrkúiekte buqaralyq aqparat quraldarynda resmi túrde jariialansyn.
4. Respýblikalyq referendýmdy uiymdastyrý men ótkizý Referendýmnyń ortalyq komissiiasynyń qyzmetin atqaratyn Qazaqstan Respýblikasynyń Ortalyq sailaý komissiiasyna, sondai-aq referendýmnyń aýmaqtyq jáne ýchaskelik komissiialarynyń qyzmetin atqaratyn aýmaqtyq jáne ýchaskelik sailaý komissiialaryna júktelsin.
5. Qazaqstan Respýblikasynyń Úkimeti Qazaqstan Respýblikasynyń Ortalyq sailaý komissiiasymen, Qazaqstan Respýblikasynyń basqa da ortalyq memlekettik organdarymen jáne jergilikti atqarýshy organdarymen birlesip respýblikalyq referendýmdy uiymdastyrý men ótkizý boiynsha qajetti sharalardy qabyldasyn.
6. Osy Jarlyq qol qoiylǵan kúninen bastap kúshine enedi», — dep jazylǵan Jarlyqta.
