Búgin «AMANAT» Tóraǵasy Erlan Qoshanov partiianyń jańa Saiasi tuǵyrnamasyn ázirleý jóninde keńes ótkizdi. Is-sharaǵa Parlament depýtattary, qoǵam qairatkerleri men sarapshylar qatysty. Sondai-aq, beine-konferents bailanys arqyly partiianyń aimaqtyq filialdary qosyldy, dep habarlaidy "Ult aqparat".
Saiasi tuǵyrnamany jańartý jumystary biyl sáýirden bastap júrgizilýde. Kezdesýdi asha otyryp, Erlan Qoshanov Qazaqstan damýdyń sapaly jańa kezeńine qadam basqanyn jáne «AMANAT» partiiasy qoǵam talabyna sai ózgerýi tiis ekenin atap ótti.
«Memleket basshysy «Jańa Qazaqstandy» qurý isine qatysty aýqymdy mindetter qoidy. Partiia osy jumysqa belsene qatysyp, Prezident reformalaryna qoldaý kórsetýi tiis. Ol úshin «AMANAT»-tyń Saiasi tuǵyrnamasyn qaita qaraý qajet. Bul qadam partiialyqtarǵa jańa baǵyt-baǵdar berip, olardyń halyq múddesin qorǵaý isindegi azamattyq belsendiligin arttyrýy tiis», – dep atap ótti E.Qoshanov.
Partiia Tóraǵasynyń pikirinshe, Saiasi tuǵyrnamany jańartý jumysy tek «halyq únine qulaq asatyn partiia» formatynda júrgizilýi tiis. Bul – asa mańyzdy másele. Erkin pikir almasý, keń saiasi dialog qamtamasyz etilýi tiis. Bul jumysqa barlyq amanattyqtar atsalysýy qajet.
«Árbir partiialyq Saiasi tuǵyrnamamyzdy bilip qana qoimai, ondaǵy qundylyqtarmen bólisýi kerek. Ony kúndelikti jumysynda basshylyqqa alǵany mańyzdy», – dep atap ótti E.Qoshanov.
Otyrys barysynda Májilistegi «AMANAT» fraktsiiasynyń músheleri Aidos Sarym, Ekaterina Smyshliaeva, Erlan Sairov, partiianyń Saiasi keńesi Biýrosynyń múshesi Marat Shibýtov, qoǵam qairatkerleri Murat Ábenov, Danat Jumin, Marat Báshimov, partiianyń aimaqtyq filialdarynyń ókilderi jáne taǵy basqalar sóz sóiledi. Partiianyń Saiasi tuǵyrnamasynda kórinis tabýy tiis tásilder belsendi talqylandy. Bul qadam «AMANAT»-tyń básekege qabilettiligin arttyryp, jańa jaǵdaida sailaýshylardyń senim údesinen shyǵýǵa múmkindik berýi tiis.
Otyrys qorytyndysy boiynsha partiia Tóraǵasy Saiasi tuǵyrnamany ázirleý isine qatysty birqatar tapsyrma júktedi. Atap aitqanda, Tuǵyrnama jobasyn jariia talqylaý uiymdastyrylady. Sonyń ishinde, saraptamalyq kezdesýler, óńirlerde jeke keńester ótkiziledi. Bul jumysqa partiianyń barlyq filialdary, Májilistegi jáne barlyq deńgeidegi máslihattardaǵy fraktsiialar tartylady.
Aýqymdy talqylaý júrgizý maqsatynda qujat partiianyń saitynda jáne áleýmettik jelilerde ornalastyrylady. Ár otandasymyz óz usynysyn engize alady. Qoǵamdyq saiasat institýty partiialyqtar arasynda jańa Saiasi tuǵyrnamanyń basymdyqtary jóninde áleýmettik saýalnama júrgizedi. Qujat jobasy «TALQYLAU» dialog alańynda sarapshylardyń, blogerler men qoǵam belsendileriniń qatysýymen talqyǵa salynady.
«AMANAT» partiiasynyń Saiasi tuǵyrnamasynyń qorytyndy jobasy biyl kúzde respýblikalyq partiia konferentsiiasynda talqylanady.
