Qazaqstan Prezidentiniń tóraǵalyǵymen Reformalar jónindegi joǵary keńestiń kezekti otyrysy ótti, dep habarlaidy Ult aqparat Aqordanyń resmi saityna silteme jasap.
Kún tártibinde 3 másele qaraldy. Jiyn Almaty aglomeratsiiasyn damytý máselesinen bastaldy. Ulttyq ekonomika ministri Álibek Qýantyrov, Almaty qalasynyń ákimi Erbolat Dosaev, Almaty oblysynyń ákimi Qanat Bozymbaev baiandama jasady.
Sondai-aq Premer-Ministr Álihan Smaiylov, Prezidenttiń ekonomikalyq damý máseleleri jónindegi shtattan tys keńesshisi, Reformalar jónindegi joǵary keńes tóraǵasynyń orynbasary Ser Sýma Chakrabarti jáne Astana halyqaralyq qarjy ortalyǵynyń basqarýshysy Qairat Kelimbetov ózderiniń usynystaryn aitty.
Sý sharýashylyǵy salasyn damytýǵa qatysty ekinshi másele boiynsha Ekologiia, geologiia jáne tabiǵi resýrstar ministri Serikqali Brekeshov sóz sóiledi.
Ministrdiń baiandamasyn tyńdaǵan Memleket basshysy Ortalyq Aziia óńirinde sý máselesi qashanda óte ózekti bolǵanyn atap ótti. Onyń aitýynsha, qazir bul saladaǵy jaǵdai kúrt nasharlap, tipti, jahandyq máselege ainalyp otyr.
– Kolýmbiia klimattyq mektebine qarasty Jer institýtynyń zertteýi boiynsha Tian-Shan taýlarynda jaýyn-shashynnyń azaiý qaýpi bar. Al bul sýarmaly egistikter men jaiylymdarǵa qajetti tushy sýdyń tapshylyǵyn týdyrady degen sóz. Taý basyndaǵy jyl boiy jatatyn qardyń kólemi azaiyp barady. Ǵalymdar aldaǵy jiyrma jylda qar budan da tez erýi múmkin degen boljam jasap otyr, – dedi Qasym-Jomart Toqaev.
Prezidenttiń aitýynsha, syrtqy sý aǵynynyń azaiýy sýdy tiimsiz paidalanýdyń saldarynan ýshyǵa túsýde. Onyń pikirinshe, sý resýrstary jaǵdaiyna memlekettik monitoring júrgizý isin kúsheitý qajet.
– Aǵyn sýlardyń rejimi men sý qoimalaryn zertteý úshin 800 gidrologiialyq beket qajet bolsa, sonyń 310-y ǵana jumys istep tur. Tolyqqandy memlekettik sý kadastry joq. Bul sý resýrstarynyń mólsheri men sapasyna monitoring jasaýǵa jáne ekonomikanyń salalaryn sýmen qamtamasyz etý jónindegi naqty teńgerimge qol jetkizýge múmkindik bermeidi, – dep Memleket basshysy.
Sonymen qatar Qasym-Jomart Toqaev sýdy paidalaný salasyndaǵy vedomstvoaralyq úilestirý jumystarynyń nashar júrgizilip jatqanyn synǵa aldy. Memleket basshysy sý sharýashylyǵy infraqurylymyn túrli memlekettik organdar basqaratynyn atap ótip, sonyń saldarynan sý resýrstaryna qatysty tiimdi saiasat júrgizilmei otyrǵanyn aitty.
– Premer-ministrdiń birinshi orynbasary janynan 2015 jyly qurylǵan Sý keńesiniń otyrysy bir-aq ret ótken. Alaida bul keńes pikir almasatyn májilis organy ǵana emes, óziniń tiimdiligin kórsetip, sheshim qabyldaýy kerek. Qazirgi máselelerge basa mán berý sektordaǵy jaǵdaidy qalpyna keltirý úshin júieli sharalar qabyldaýǵa múmkindik bermei otyr. Transshekaralyq ózenderde sý bólý máselesi boiynsha Qazaqstannyń kelissóz júrgizýdegi ustanymy álsiz bolýy osyǵan bailanysty. Ishki sý saiasaty myqty bolmasa, kórshi eldermen tiisti sý diplomatiiasyn qurý múmkin emes, – dedi Prezident.
«Jańa ekonomikalyq saiasat» máselesi boiynsha Ulttyq ekonomika ministri Álibek Qýantyrov, Strategiialyq josparlaý jáne reformalar agenttiginiń tóraǵasy Áset Erǵaliev, «Atameken» Ulttyq kásipkerler palatasy prezidiýmynyń tóraǵasy Raiymbek Batalov, Prezidenttiń shtattan tys keńesshisi Sýma Chakrabarti baiandama jasady.
Memleket basshysynyń pikirinshe, buryn-sońdy bolmaǵan jahandyq syn-qaterler júrgizilip otyrǵan ekonomikalyq saiasatty tolyǵymen qaita zerdeleýdi talap etedi.
– Biz alǵa qoiǵan maqsattarǵa qol jetkizý tásilderin ózgertemiz. Máseleniń máni osynda. Sondyqtan jobada jalpy baǵyttar men urandardyń ǵana kórsetilgeni emes, sondai-aq naqty baǵyttar, jańa ádisterdiń jobasy berilgeni de óte mańyzdy. Sonymen qatar pysyqtaýdy qajet etetin birneshe másele bar. Birinshi, meniń oiymsha, qujatty naqtylai túsý qajet. Mysaly, árbir baǵyt boiynsha iske asyrylýǵa tiis ekonomikalyq reformalar tiziminiń úlgisi jáne olardyń mindetteri men maqsattary kórsetilýi kerek. Sondai-aq jobada tehnologiialyq jańǵyrý jáne innovatsiialardy engizý tásilderi naqtylanbaǵan. Jańa jaǵdaida innovatsiialyq saiasat qandai bolýǵa tiis? Ókinishke qarai, bul máselede naqty ustanym joq. Ekinshiden, qujat aiasynda «Samuryq-Qazyna» qory men «Báiterek» holdinginiń rólin anyqtaý qajet. Bular ekonomika úshin de, memlekettik saiasat úshin de óte mańyzdy sýbektiler. Sondyqtan olardyń jumysyn durys júrgizý arqyly búkil ekonomikalyq saiasattyń tiimdiligin anyqtaýǵa bolady, – dedi Qasym-Jomart Toqaev.
Prezident jalpy usynylǵan tásilderdi maquldady jáne búgingi talqylaýdyń nátijelerin eskere otyryp, qujatty pysyqtaýdy tapsyrdy.
