Aqordada ótken Meditsina qyzmetkeri kúnine arnalǵan saltanatty jiynda Memleket basshysy Qasym-Jomart Toqaev elimizdiń densaýlyq saqtaý salasyndaǵy negizgi jetistikterdi atap ótti, dep habarlaidy ult.kz.
Prezidenttiń aitýynsha, memleket meditsina salasyn damytýǵa árdaiym erekshe kóńil bólip keledi jáne bul baǵyttaǵy jumystar naqty nátijeler berýde.
«Byltyr elimiz boiynsha azamattardyń ortasha ómir súrý uzaqtyǵy 76 jasqa jaqyndady. Sońǵy úsh jylda ana ólimi 35 paiyzǵa, al sábi ólimi 24 paiyzǵa qysqardy. Bul – Táýelsizdik jyldaryndaǵy eń tómengi kórsetkish», – dedi Memleket basshysy.
Qasym-Jomart Toqaevtyń málimetinshe, sońǵy jeti jyl ishinde Qazaqstanda shamamen 1300 densaýlyq saqtaý nysany salynǵan. Sonymen qatar mindetti meditsinalyq saqtandyrý júiesi de zaman talabyna sai jańǵyrtylǵan.
Prezident densaýlyq saqtaý salasynda búginde 280 myńnan astam maman eńbek etip jatqanyn aityp, dárigerlerdiń mártebesin arttyrý memleket úshin mańyzdy mindet bolyp qala beretinin jetkizdi.
Memleket basshysy meditsina qyzmetkerleriniń qaýipsizdigine de erekshe toqtaldy. Onyń aitýynsha, dárigerlerge qatysty kúsh qoldaný faktileriniń aldyn alý úshin zańnamalyq sharalar kúsheitilgen.
«Osy jyldyń basynda meditsina qyzmetkerlerine kúsh kórsetken adamdardy qylmystyq jaýapkershilikke tartý týraly Zańǵa qol qoidym. Bul sheshim qoǵamymyzda berik ornyǵyp jatqan Zań men tártip qaǵidatyna tolyq sai keledi», – dedi Prezident.
Toqaevtyń sózinshe, dárigerlerdiń quqyǵy men qaýipsizdigin qamtamasyz etý, sondai-aq olardyń qoǵamdaǵy bedelin kóterý aldaǵy ýaqytta da memlekettik saiasattyń basym baǵyttarynyń biri bolyp qala beredi.
