«Siriýs» federaldyq aýmaǵynda balalar men jastarǵa arnalǵan «Siriýs – Roza Hýtor» halyqaralyq óner festivali jalǵasyp jatyr. Búgin festival aiasynda «Astana Opera» memlekettik opera jáne balet teatrynyń baǵdarlamasy usynyldy, dep habarlaidy ult.kz.
Teatr ujymy sahnaǵa shyǵar aldynda Qazaqstan Respýblikasynyń Prezidenti Qasym-Jomart Toqaevtyń festivalge qatysýshylar men uiymdastyrýshylarǵa arnaǵan quttyqtaý haty oqyldy.
Memleket basshysy óz quttyqtaýynda festivaldi Resei men dostas memleketter arasyndaǵy mádeni bailanystardy nyǵaitýǵa yqpal etetin mańyzdy gýmanitarlyq joba dep baǵalady. Sondai-aq is-shara óner maitalmandary, jetekshi shyǵarmashylyq ujymdar men jas talanttardyń basyn qosqanyn erekshe atap ótti.
«Bul festival mádeni-gýmanitarlyq yntymaqtastyqty jańa deńgeige kóterip, elderimiz arasyndaǵy dostyq pen jan-jaqty áriptestiktiń odan ári beki túsýine serpin beredi dep senemin», – delingen Memleket basshysynyń quttyqtaýynda.
Festival aiasynda «Astana Opera» memlekettik opera jáne balet teatrynyń ártisteri óner kórsetti. Teatr ujymy «Siriýs» kontsert ortalyǵynyń bas sahnasynda frantsýz baletmeisteri Rolan Petidiń horeografiiasymen qoiylǵan Leo Delibtiń «Koppeliia» baletin sahnalady.
Qoiylymǵa dirijer Rýslan Baimýrzin jetekshilik etti. Basty partiialardy teatrdyń jetekshi solisteri Áigerim Beketaeva, Arman Orazov jáne Oljas Tarlanov oryndady.
«Astana Operanyń» festival aiasyndaǵy baǵdarlamasy 16 shildege deiin jalǵasady.
Kórermenge klassikalyq jáne zamanaýi balet qoiylymdarymen qatar, teatr ártisteri men HasSak etno-folklorlyq ansambliniń qatysýymen ulttyq baǵdarlama usynylady.
