Foto: Aqorda
Búgin Memleket basshysy Qasym-Jomart Toqaev Premer-Ministr Oljas Bektenovti qabyldap, 2024 jyldyń úshinshi toqsanyndaǵy áleýmettik-ekonomikalyq damý kórsetkishteri men zańsyz ielengen aktivterdi qaitarý boiynsha atqarylǵan jumystar jaily esepti tyńdady.
Ekonomikany ártaraptandyrý jáne turaqty ósim
Kezdesý barysynda Premer-Ministr Bektenov eldiń áleýmettik-ekonomikalyq damý kórsetkishteri jóninde baiandama jasady. Onyń aitýynsha, Memleket basshysynyń tapsyrmalaryn júzege asyrý aiasynda ekonomikany ártaraptandyrý sharalary kúsheitilgen. Bul sharalar el ekonomikasyna oń áserin tigizip, shikizattyq emes sektordy damytý nátijesinde ishki jalpy ónim (IJÓ) 4 paiyzǵa ósken.
Ásirese aýyl sharýashylyǵy, qurylys, kólik, bailanys, saýda jáne óńdeý ónerkásibi salalary aitarlyqtai ósim kórsetken. Aýyl sharýashylyǵynyń ósimi 11,4 paiyzdy, qurylystyń – 10,1 paiyzdy, kóliktiń – 8 paiyzdy, bailanys – 6,4 paiyzdy, saýda – 6,3 paiyzdy, al óńdeý ónerkásibiniń ósimi 4,8 paiyzdy quraǵan. Bul salalardyń damýy ekonomikanyń turaqtylyǵyn arttyryp, óndiris kólemin ulǵaitýǵa múmkindik bergen.
Sonymen qatar, 2024 jyldyń qańtar-tamyz ailarynda Qazaqstannyń syrtqy taýar ainalymy 91,7 milliard AQSh dollaryna jetken, onyń ishinde eksport kólemi 3,3 paiyzǵa ósken. Saýda balansy oń nátije kórsetip, 15,4 milliard dollarǵa jetken, bul ótken jylmen salystyrǵanda 34,8 paiyzǵa artyq.
Zańsyz ielengen aktivterdi qaitarý boiynsha nátijeler
Kezdesý barysynda Premer-Ministr zańsyz iemdenilgen aktivterdi memleketke qaitarý jónindegi jumystardyń barysy týraly da málimet berdi. Oljas Bektenovtiń aitýynsha, jyl basynan beri arnaiy komissiia 450 milliard teńgege jýyq aktivterdi qaitarý jónindegi kelisimderdi maquldaǵan. Búgingi kúnge deiin memleketke 265 milliard teńgeniń aktivteri, sonyń ishinde 177 milliard teńge aqshalai qaitarylǵan.
Qaitarylǵan qarajat elimizdegi áleýmettik mańyzy bar jobalarǵa, atap aitqanda, muqtaj adamdardy ońaltý jáne áleýmettendirý baǵdarlamalaryna, mádeni-bilim berý ortalyqtarynyń qurylysyn qarjylandyrýǵa jáne sporttyq nysandar salýǵa baǵyttalyp otyr.
Sonymen qatar, "Zańsyz iemdenilgen aktivterdi memleketke qaitarý týraly" Zań aiasynda birneshe mańyzdy jobalar júzege asyp jatqanyn atap ótti. Bul jobalardyń qatarynda halyqtyń áleýmettik jaǵdaiyn jaqsartýǵa baǵyttalǵan baǵdarlamalar bar.
ShYU Úkimet basshylary keńesiniń qorytyndylary
Bektenov Islamabadta ótken Shanhai yntymaqtastyq uiymyna múshe memleketterdiń Úkimet basshylary keńesiniń otyrysynyń qorytyndylary týraly da baiandady. Atalǵan jiyn barysynda saýda, ekonomika, kólik jáne infraqurylymdyq jobalar salasyndaǵy yntymaqtastyqty nyǵaitý máseleleri talqylanǵan.
Prezidenttiń tapsyrmalary
Qasym-Jomart Toqaev Úkimettiń jumysyn jandandyrý qajettigin atap ótip, ekonomikany ártaraptandyrý, onyń turaqty ósimin qamtamasyz etý úshin shaǵyn jáne orta biznesti qoldaý, agroónerkásip kesheninde innovatsiiany damytý, iri indýstrialdyq jáne infraqurylymdyq jobalardy júzege asyrý sharalaryn jalǵastyrýdy tapsyrdy.
Memleket basshysy ekonomikany turaqtandyrý baǵytynda naqty ári shuǵyl sharalar qabyldaýdyń mańyzdylyǵyn erekshe atap ótti.
