Qasym-Jomart Toqaev Qazaqstan Ulttyq paralimpiada qurama komandasynyń múshelerimen kezdesti, dep habarlady "Ult aqparat" Aqordanyń baspasóz qyzmetine silteme jasap.
Memleket basshysy XVI jazǵy Paralimpiada oiyndarynyń qarsańynda Ulttyq qurama komandasynyń múshelerimen kezdesti. Prezident sportshylardyń Táýelsiz Qazaqstan tarihynda alǵash ret Paralimpiada oiyndaryna 25 joldama utyp, bairaqty básekege úlken qurammen attanyp bara jatqanyn atap ótti. Qasym-Jomart Toqaevtyń aitýynsha, paralimpiadashylar – qajymas qairat pen qaisarlyqtyń simvoly.
– Álemdegi júz myńdaǵan sportshynyń arasynan úzdik shyǵyp, osy oiyndarǵa joldama alý ekiniń biriniń qolynan kele bermeidi. Sizder buǵan tabandylyq pen kásibi daiyndyqtyń arqasynda qol jetkizýge bolatynyn dáleldedińizder. Demek, árbir para sportshymyzdy qazirdiń ózinde jeńimpaz deýge bolady. Ózderińizdi barsha otandasymyz maqtan tutady, – dedi Memleket basshysy.
Prezident elimizdegi para sport túrimen ainalysatyn azamattarǵa memleket tarapynan qoldaý jalǵasa beretinin aitty.
– Búkil elimiz boiynsha 20 myńǵa jýyq azamat para sport túrimen júieli túrde ainalysady. Sonyń ishinde 500 sportshy ulttyq qurama sapynda óner kórsetedi. Biz paralimpiadalyq sport túrlerin damytý úshin qajetti jaǵdaidy jasai beremiz. Qazir óńirlerde 16 arnaiy klýb pen mektep jumys isteidi. Osy rette, Nur-Sultan qalasynda 2018 jyly ashylǵan Paralimpiadalyq jattyǵý ortalyǵyn erekshe atap ótken jón. Zaman talabyna sai jabdyqtalǵan mundai ortalyq AQSh, Ulybritaniia, Japoniia, Ońtústik Koreia elderimen qatar bizdiń elordamyzda da bar. Sport salasy barlyq azamatymyz úshin birdei qoljetimdi bolýǵa tiis. Osy oraida múmkindigi shekteýli azamattarǵa qolaily orta qalyptastyrý memleket mindeti ekenin basa aitqym keledi, – dedi Qasym-Jomart Toqaev.
Qazaqstan Ulttyq paralimpiada quramasy osyǵan deiin bul oiyndardan eki altyn jáne eki kúmis medal jeńip alǵan bolatyn. Bul jetistikterdi sportqa degen súiispenshilik pen eren eńbektiń nátijesi dep baǵalaǵan Memleket basshysy qurama komanda múshelerine zor senim artty.
Paradziýdodan Aziia chempiony, Álem kýbogynyń iegeri Temirjan Dáýlet memlekettiń tiisti qoldaý kórsetkeni úshin Qazaqstan Prezidentine ulttyq quramadaǵy sportshylar atynan alǵys aitty.
– Biyl – Qazaqstan Respýblikasynyń Táýelsizdigine 30 jyl. Men táýelsizdiktiń qurdasymyn. Azat elde týyp-ósken men siiaqty jastardyń arman-maqsaty – kók bairaǵymyzdy biikte jelbiretý. Bapkerlerimiz jan-jaqty daiyndalýymyzǵa zor eńbek sińirdi. Tokioda bar kúsh-jigerimizdi salamyz, – dedi sportshy.
Parataekvondodan eki dúrkin álem chempiony Nurlan Dombaev sportshylardyń jattyǵýyna jaqsy múmkindik jasalǵanyn aitty.
– Parasportshylardyń turaqty túrde oqý-jattyǵý jiyndaryn ótkizýine jaǵdai jasaldy. Ózim Qazaqstannyń úsh qalasynda daiyndaldym. Qatarymyzda shetelde jattyqqandar da bar. Sonyń nátijesinde Rioǵa on sportshy ǵana barsa, biyl qatarymyz eki eseden asty. Parataekvondo paralimpiada oiyndaryna alǵash ret engizilip otyr. Ultymyzdy uiystyryp, halqymyzǵa jiger beretin jeńiske jetý – basty maqsatymyz, – dedi Nurlan Dombaev.
Ulttyq paralimpiada komitetiniń prezidenti Qairat Boranbaev pen ulttyq quramanyń paýerlifting boiynsha Bas bapkeri Artýr Tomitskii sportshylardyń daiyndyǵy týraly málimet berdi.
Jiyn sońynda Memleket basshysy sportshylarymyzdyń ónerin búkil halqymyz tamashalap, jankúier bolatynyn aitty. Sondai-aq olardyń jeńisi Táýelsizdigimizdiń 30 jyldyǵyna tamasha tartý bolatynyn atap ótip, ult namysy synǵa túsetin saiysta sáttilik tiledi.
