Kombinat shikizat óndirýden bastap odan daiyn ónim alýǵa deiingi óndiristiń búkil tsiklyn qamtityn keýekti titan, titan quimalary men qorytpalaryn shyǵaratyn álemdegi birtutas kásiporyndardyń biri sanalady, dep habarlaidy "Ult aqparat".
Óndiris qurylymy 5 negizgi jáne 6 qosalqy tsehtan, sondai-aq enshiles ári birlesken kásiporyndardan turady.
Álemdegi titan naryǵynyń 11 paiyzy Qazaqstanǵa tiesili, al aeroǵarysh salasyndaǵy titannyń 20 paiyzdan astamyn bizdiń el qamtamasyz etedi. Memleket basshysyna kombinat ónimin Airbus, Boeing, TIMET, ATI, Safran, UKAD, Pratt&Whitney, General Electric, Dynamet, Howmet, POSCO, Baoti, MIDHANI sekildi álemdik iri kompaniialar sertifikattaǵany týraly baiandaldy.
Qazaqstan titany keme jasaý isinde, energetika, aeroǵarysh salalarynda, munai-gaz kásipornynda jáne meditsinada keńinen paidalanylady. Ónim AQSh-qa, Ulybritaniiaǵa, Frantsiiaǵa, Ońtústik Koreiaǵa, Úndistanǵa jáne Qytaiǵa eksporttalady.
Aldaǵy on jylda kombinat jalpy somasy 207 milliard teńge bolatyn 25 investitsiialyq jobany júzege asyrýdy josparlap otyr. Qasym-Jomart Toqaev óndiris tsehtaryn aralap kórip, kombinat jumysshylarymen áńgimelesti.
"Bul kombinat kóptegen ólshem boiynsha ozyq mekeme sanalady. Zamanaýi quraldarmen jabdyqtalǵan. Qazaqstan titan óndirisi boiynsha álemdik naryqta jetekshi oryn alady. Elimiz úshin mundai kásiporyndar óte qajet. Jumystaryńyz tabysty bolsyn", – dedi Prezident.
