Ishki migratsiiany yntalandyratyn qosymsha shara retinde olarǵa beriletin járdemaqynyń mólsherin 35 AEK-ten 70-ke deiin kóbeitken jón. Bul týraly Ulttyq qoǵamdyq senim keńesiniń 4-otyrysynda Memleket basshysy Qasym-Jomart Toqaev aitty, dep habarlaidy "Ult aqparat".
«Sonymen birge el ishindegi migratsiialyq úderisterdi retteý isiniń tiimdiligin arttyra túsý qajet. Bul eń aldymen azamattarymyzdy elimizdiń ońtústiginen soltústigine kóshirýge qatysty. Osy másele Ulttyq keńeste birneshe ret kóterildi. Ony keshendi túrde sheshý úshin birinshiden, elektrondy eńbek birjasynyń bazasynda biryńǵai aqparattyq resýrs qurý kerek. Kóship barýshylarǵa memleket kórsetetin qoldaý jónindegi barlyq aqparatty tikelei ári jedel alýy qajet. Ekinshiden, qazirgi kóshýge qatysty máselelerdi ońailatqan jón. Memleket migranttarǵa barynsha qolaily jaǵdai jasýǵa tiis», - dedi Memleket basshysy.
QR Prezidenti jaqynda jumys saparymmen Soltústik Qazaqstan oblysynda bolǵanyn atap ótti.
«Bul óńir demografiialyq ósimi eń baiaý aimaqtyń biri bolǵanymen qonys aýdarýshylardy tartý jaǵynan jaqsy nátije kórsetip otyr. Aimaqta kóship kelýshilerge arnalǵan turǵyn úiler salynýda. Sonymen qatar kommýnaldyq infraqurylym damyp, ártúrli áleýmettik nysandar boiy kóterýde. Qonys aýdarýshylardy yntalandyratyn qosymsha shara retinde olarǵa beriletin járdemaqynyń mólsherin 2 esege, iaǵni 35 AEK-ten 70-ke deiin kóbeitken jón dep sanaimyn. Úkimetke bir aidyń ishinde osy máseleni zerttep, tiisti sheshim qabyldaýdy tapsyramyn»,- dedi Qasym-Jomart Toqaev.
