Foto: Aqorda
Memleket basshysy Qasym-Jomart Toqaev Joldaýynda óńdeý ónerkásibiniń damýyna jańa serpin beretin ýaqyt kelgenin aitty, dep habarlaidy Ult.kz.
Prezidenttiń aitýynsha, sońǵy bes jylda salada eleýli nátijeler bar:
-
óńdeý ónerkásibiniń jalpy qosymsha quny eki ese ósip, 17 trln teńgege jetti;
-
onyń JIÓ-degi úlesi 12,4%-ǵa artty;
-
tek ótken jyly 163 jańa óndiris iske qosylyp, 12,5 myń turaqty jumys orny ashyldy.
Almaty, Qostanai, Qaraǵandy, Atyraý oblystarynda mashina jasaý men metallýrgiia salasynda iri kásiporyndar ashyldy. Biyl Almatyda Qazaqstandaǵy eń iri avtokólik óndirisi iske qosyldy.
Alaida Prezident ekonomikany ártaraptandyrýdy tyń qarqynmen jalǵastyrý qajettigin atap ótti. Qazirgi qoldaý sharalary júiesiz júrgizilip jatqandyqtan, kásipkerler úshin túsiniksiz jaǵdai týyndaidy. Sondyqtan bul salany úilestirýdi kúsheitý mindeti qoiyldy.
Taý-ken metallýrgiiasy áli de ekonomikanyń senimdi tiregi bolyp otyr (úlesi – 8%). Biraq onyń áleýeti áldeqaida joǵary. Álemdik úrdisterge sai, sirek kezdesetin metaldar men qajetti materialdardy tereń óńdeý mańyzdy. Qazaqstan aldaǵy úsh jylda osy salada joǵary tehnologiialyq ónim shyǵaratyn keminde úsh kásiporyndy iske qospaq.
Sonymen qatar, Úkimetke kómirsýtegi shikizatyn tereń óńdeýge baǵyttalǵan birqatar jobalardy júzege asyrý tapsyryldy. Atyraýda gaz-himiia kesheni, Pavlodarda suiytylǵan gazdy óńdeý jobasy qolǵa alyndy.
«Ilespe gaz ben suiytylǵan munai gazyn tolyqqandy ekonomikalyq resýrsqa ainaldyrý qajet. Investorlardy uzaq merzim gazben qamtamasyz etetin naqty kepildikter berýdiń jańa tásilderin oilastyrýymyz kerek», – dedi Prezident.
Memleket basshysy jobalardy der kezinde iske asyrý úshin jetkilikti elektr energiiasyn qamtamasyz etý asa mańyzdy ekenin de qosa aitty.
