Prezident Qasym-Jomart Toqaev memleket jáne qoǵam qairatkeri Myrzatai Joldasbekovti 85 jasqa tolýymen quttyqtap, jedelhat joldady, - dep habarlaidy "Ult aqparat" Aqordanyń baspasóz qyzmetine silteme jasap.
"Halqymyz ózińizdi memleket jáne qoǵam qairatkeri, ǵalym, qarymdy qalamger retinde jaqsy biledi jáne qurmetteidi. Ustazdyqtan bastalǵan eńbek jolyńyzda ministr, Premer-Ministrdiń orynbasary, Elshi, ýniversitet rektory, Prezidenttik ortalyqtyń basshysy siiaqty jaýapty laýazymdardy abyroimen atqaryp, elimizdiń mártebesi men bedeliniń arta túsýine atsalystyńyz. Ádebi qazynamyzdyń qainar bulaǵy bolǵan aqyn-jyraýlardyń shyǵarmashylyǵyn jańa qyrynan kórsetip, qazaq úshin aitys óneriniń airyqsha ról atqaratynyn dáleldep berdińiz. Orhon-Enisei jazba eskertkishterin tereń zerdeledińiz. Sizdiń qalamyńyzdan shyqqan "Ejelgi ádebiet nusqalary", "Kúltegin", "Asyl sózdiń atasy", "Kisilik kitaby", "Tańǵalamyn ómirdiń ǵajabyna" jáne basqa da kitaptaryńyz - ulttyq qundylyqtarymyzdy dáripteý men jańǵyrtýdyń jarqyn úlgisi. Aldaǵy ýaqytta da qoǵamdyq-saiasi isterge belsendi atsalysyp, el-jurttyń shynaiy qurmetine bólenip, mereiińizdiń ústem bola berýine tilektestik bildiremin", - dep jazylǵan quttyqtaý jedelhatynda.
