Foto: Aqorda
Qasym-Jomart Toqaev ustazdar qaýymyn kásibi merekesimen quttyqtap, asa jaýapty ári qasterli mindetti abyroimen atqaryp júrgen pedagogterge alǵys aitty. Bul týraly Aqorda habarlady.
Sonymen qatar prezident elimizdegi oqý-aǵartý salasyn damytý jolynda júzege asyrylyp jatqan aýqymdy jumystarǵa toqtaldy.
"Meniń tapsyrmammen "Pedagog mártebesi týraly" arnaiy zań qabyldandy. Bul qujat ustazdardyń zańdy múddesi men quqyqtaryn qorǵaýǵa yqpal etti. Qazir muǵalimder men tárbieshilerdiń jalaqysy aitarlyqtai kóbeidi. Olar negizgi qyzmetine kedergi keltiretin artyq mindetterden bosatyldy. Osy zańǵa sáikes "Qazaqstannyń eńbek sińirgen ustazy" ataǵy engizildi. Bul – jai ataq emes, mártebeli memlekettik nagrada. Onyń iegerine qomaqty syiaqy beriledi. Respýblika boiynsha 46 muǵalim osy nagradaǵa ie boldy. Sondai-aq qazir ustazdarǵa akademiialyq dárejesine sáikes ústemeaqy tólenip jatyr. Halyqaralyq olimpiada júldegerlerin daiyndaǵan muǵalimderge qarjylai qoldaý kórsetiledi. Pedagog mamandyǵy boiynsha oqyp jatqan stýdentterdiń shákirtaqysy 2,5 ese kóbeidi. Biyl bolashaq ustazdardy daiarlaý úshin 16 myńǵa jýyq grant bólindi. Sonyń ishinde shamamen 1800 "Altyn belgi" iegeri pedagogika mamandyǵyn tańdady. Bul – óte jaqsy úrdis", - dedi memleket basshysy.
Toqaev elimizde bilim salasyndaǵy úzdik mamandardy, iaǵni naǵyz kóshbasshylardy irikteý jobasy júzege asyrylyp jatqanyna toqtaldy.
Qazirdiń ózinde atalǵan jobaǵa qatysqan 134 pedagog mektep direktory bolyp taǵaiyndalǵan. Budan bólek, prezident bilim sapasyn arttyrý, balalardy úilesimdi jáne jan-jaqty damytý úshin memleket tarapynan qolǵa alynǵan júieli sharalarǵa nazar aýdardy.
"Jaily mektep" ulttyq jobasy aiasynda kelesi jyly 460 myńnan astam balaǵa arnalǵan 217 jańa mektep salý josparlanǵan. Olar zamanaýi talaptarǵa sai jabdyqtalǵan ozyq bilim oshaǵy bolady. Mektepterde erekshe qajettilikteri bar balalardyń kedergisiz bilim alýyna qolaily jaǵdai jasalady. Atalǵan aýqymdy joba úsh aýysymdy mektepter máselesin sheshýge, qala men aýyl mektepterindegi bilim alshaqtyǵyn azaitýǵa múmkindik beredi. Budan bólek, elimizde jyl saiyn keminde myń mekteptiń ǵimaratyna jańǵyrtý jumystary júrgiziledi. Bilim berý protsesin tsifrlandyrýǵa basa nazar aýdarylady. Barlyq mektepti jyldamdyǵy joǵary internetke qosý boiynsha keshendi jumys qolǵa alynady. Qosymsha bilim berýge erekshe mán beriledi. Onyń aiasynda úsh millionnan asa adamdy qamtý josparlanyp otyr. Biyl otandyq mektepterdiń oqýshylary halyqaralyq olimpiadalardan 360-tan astam medal jeńip aldy. Bul – ustazdarymyzdyń jankeshti eńbegi men kásibiliginiń jemisi", - dedi memleket basshysy.
Prezident ulaǵatty ustazdar tutas ultty tárbieleitinin atap ótip, jastardyń boiyna adal azamatqa tán qasietterdi sińirý óte mańyzdy ekenin jetkizdi.
"Oqýshylardy bilimpazdyqqa, otanshyldyqqa, eńbekqorlyqqa baýlý qajet. Árine, qazirgi zamanda bul ońai sharýa emes. Sońǵy kezde internettiń teris baǵyttaǵy shyrmaýyna túsken jastar kóbeiip ketti. Biz balalardy túrli qaterden qorǵai bilýimiz kerek. Osyǵan bailanysty naqty sharalar qabyldanyp jatyr. Meniń tapsyrmammen "Birtutas tárbie" atty arnaiy baǵdarlama daiyndaldy. Bul qujatta Ulttyq quryltaida aitylǵan usynys-pikirler eskerildi. Mektepterde ata-analardy pedagogikalyq qoldaý ortalyqtary ashyldy", - dedi memleket basshysy.
Qasym-Jomart Toqaev sanaly urpaq tárbieleý isine ustazdarmen birge ata-analar da atsalysýy qajet dep sanaidy. Bul oraida, Prezident muǵalimderdiń pandemiia, sý tasqyny kezinde oqý úderisin toqtatpai, mindetin adal atqaryp, elge janashyrlyq tanytqanyn mysal etti.
"Muǵalimniń mártebesi qashanda bárinen biik. Uly tulǵalardyń ózi ustazynyń aldynda shákirt bolyp qala beredi. Bir sózben aitsaq, barsha jetistiktiń bastaýynda ustaz tur. Ulttyń bolashaǵy – ustazdyń qolynda. Meniń maqsatym – ustazdy qoǵamymyzdyń basty keiipkeri retinde dáripteý. Sebebi sizder bala oqytý arqyly keleshektiń kirpishin qalaisyzdar. Qazaqstannyń damyǵan el bolýyna zor úles qosyp júrsizder. Sizderdiń tabandy eńbekterińiz erekshe qurmet pen joǵary marapatqa laiyq", - dedi prezident.
Memleket basshysy Qazaqstannyń túkpir-túkpirinde eńbegi eren muǵalimder jetkilikti ekenin atap ótip, aldaǵy ýaqytta olar da nazardan tys qalmaitynyn aitty.
"Ustazdar áýletine airyqsha mán beriledi. Búgin men bilim berý isinde 350 jyl eńbek ótili bar Asylaevtar otbasy týraly maqalany oqydym. Olar Abai oblysynda turady eken. Mundai ónegeli áýletter elimizde kóp dep oilaimyn", - dedi Qasym-Jomart Toqaev.
Jiyn sońynda memleket basshysy bilim berý isindegi asa úzdik jetistikteri jáne Qazaqstan Respýblikasyna sińirgen airyqsha eńbegi úshin bir top pedagogke "Qazaqstannyń eńbek sińirgen ustazy" ataǵyn tapsyrdy.
