«Qazaqstannyń 100 jańa esimi» jobasynyń jeńimpazdary ortalyq memlekettik organdardyń basshylarymen turaqty kezdesip turýy kerek. Prezident Qasym-Jomart Toqaev joba finalisterimen kezdesýinde osyndai tapsyrma berdi, dep habarlaidy "Ult aqparat".
Memleket basshysy Táýelsizdiktiń 30 jyldyǵy qarsańynda júieli jańǵyrtýlar arqyly jańa serpilistiń negizin salý qajettigin atady.
«Joǵaryda aitqanymdai, biz memlekettiligimiz úshin mańyzdy osynaý mereitoidy azamattardyń muqtajdyqtary men qajettilikterine baǵyttalǵan naqty ister men jobalarmen tolyqtyrýǵa tiispiz. «100 jańa esim» jobasy jeńimpazdarynyń qyzmeti men bastamalary osy ózekti mindetke tolyq jaýap beredi. Olardyń ideialary men usynystaryn neǵurlym tiimdi ilgeriletý úshin finalisterdiń ortalyq memlekettik organdardyń basshylarymen turaqty kezdesýler praktikasyn júieli negizde engizý qajet. Meniń oiymsha, bul ózara paidaly bolady», - degen Memleket basshysy elimizdiń talantty jastary kásipqoilyqtyń jańa belesterin baǵyndyrý arqyly týymyzdy biikke kótere beretinine senim bildirdi.
