QR Prezidenti Qasym-Jomart Toqaev sybailas jemqorlyqqa qarsy is-qimyl jónindegi keńeste memlekettik satyp alý salasyndaǵy «barmaq basty-kóz qysty» tásilder týraly aitty, dep habarlaidy QazAqparat tilshisi.
«Memlekettik satyp alýlar men kvazimemlekettik sektordaǵy satyp alýlardyń búkil júiesin qaita qaraý qajet. Bul týraly jiyn saiyn aityp kelemiz. Joldaýda da aitqan bolatynmyn», - degen Prezident sybailas jemqorlyqty aýyzdyqtaý úshin qabyldanǵan sharalar jaǵdaidy aitarlyqtai ózgerte qoimaǵanyn synǵa aldy.
«Erejelerdiń kóbi formaldy ekeni baiqalyp otyr. Olardyń aýqymdylyǵy adal jetkizýshilerdi úrkitedi. Memlekettik satyp alýlarǵa repýtatsiiasy durys, tiisti tehnikalary men bilikti qyzmetkerleri bar, salyqtardy ýaqtyly tóleitin jetkizýshiler qatysýy kerek. Qazir biz sybailas jemqorlyqty naqty joiýdyń ornyna biýrokratiialyq protsesterdiń júrip jatqanyn kórip otyrmyz. Jetkizýshini tańdaý rásimderi birneshe aiǵa sozylady. Biraq sodan bolyp jetkiziletin taýardyń nemese kórsetiletin qyzmettiń sapasy artyp, satyp alý protsesi adal arnaǵa túsip jatqan joq. Barlyq normativtik súzgilerge qaramastan, belgili bir tenderdi kim jeńetini aldyn ala belgili bolyp otyrady», - degen Memleket basshysy «Qazavtojol» kompaniiasyn mysalǵa keltirdi.
«Eki jyl ishinde tehnikalyq qadaǵalaý qyzmetterin satyp alý boiynsha 99 konkýrs ótkizdi. Olardyń jartysyn iesi bir, ataýlary basqa tórt kompaniia jeńip alǵan», - dedi Qasym-Jomart Toqaev.
