قر پرەزيدەنتٸ قاسىم-جومارت توقاەۆ سىبايلاس جەمقورلىققا قارسى ٸس-قيمىل جٶنٸندەگٸ كەڭەستە مەملەكەتتٸك ساتىپ الۋ سالاسىنداعى «بارماق باستى-كٶز قىستى» تەسٸلدەر تۋرالى ايتتى, دەپ حابارلايدى قازاقپارات تٸلشٸسٸ.
«مەملەكەتتٸك ساتىپ الۋلار مەن كۆازيمەملەكەتتٸك سەكتورداعى ساتىپ الۋلاردىڭ بٷكٸل جٷيەسٸن قايتا قاراۋ قاجەت. بۇل تۋرالى جيىن سايىن ايتىپ كەلەمٸز. جولداۋدا دا ايتقان بولاتىنمىن», - دەگەن پرەزيدەنت سىبايلاس جەمقورلىقتى اۋىزدىقتاۋ ٷشٸن قابىلدانعان شارالار جاعدايدى ايتارلىقتاي ٶزگەرتە قويماعانىن سىنعا الدى.
«ەرەجەلەردٸڭ كٶبٸ فورمالدى ەكەنٸ بايقالىپ وتىر. ولاردىڭ اۋقىمدىلىعى ادال جەتكٸزۋشٸلەردٸ ٷركٸتەدٸ. مەملەكەتتٸك ساتىپ الۋلارعا رەپۋتاتسيياسى دۇرىس, تيٸستٸ تەحنيكالارى مەن بٸلٸكتٸ قىزمەتكەرلەرٸ بار, سالىقتاردى ۋاقتىلى تٶلەيتٸن جەتكٸزۋشٸلەر قاتىسۋى كەرەك. قازٸر بٸز سىبايلاس جەمقورلىقتى ناقتى جويۋدىڭ ورنىنا بيۋروكراتييالىق پروتسەستەردٸڭ جٷرٸپ جاتقانىن كٶرٸپ وتىرمىز. جەتكٸزۋشٸنٸ تاڭداۋ رەسٸمدەرٸ بٸرنەشە ايعا سوزىلادى. بٸراق سودان بولىپ جەتكٸزٸلەتٸن تاۋاردىڭ نەمەسە كٶرسەتٸلەتٸن قىزمەتتٸڭ ساپاسى ارتىپ, ساتىپ الۋ پروتسەسٸ ادال ارناعا تٷسٸپ جاتقان جوق. بارلىق نورماتيۆتٸك سٷزگٸلەرگە قاراماستان, بەلگٸلٸ بٸر تەندەردٸ كٸم جەڭەتٸنٸ الدىن الا بەلگٸلٸ بولىپ وتىرادى», - دەگەن مەملەكەت باسشىسى «قازاۆتوجول» كومپانيياسىن مىسالعا كەلتٸردٸ.
«ەكٸ جىل ٸشٸندە تەحنيكالىق قاداعالاۋ قىزمەتتەرٸن ساتىپ الۋ بويىنشا 99 كونكۋرس ٶتكٸزدٸ. ولاردىڭ جارتىسىن يەسٸ بٸر, اتاۋلارى باسقا تٶرت كومپانييا جەڭٸپ العان», - دەدٸ قاسىم-جومارت توقاەۆ.
