Eki aidyń ishinde Úkimet meditsina qyzmetkerlerine ústemeaqy tóleýdiń jańa júiesin usynýy kerek. Úkimettiń keńeitilgen otyrysynda Prezident Qasym-Jomart Toqaev osyndai mindet qoidy, dep habarlaidy "Ult aqparat".
«Koronavirýstyń taralýy jaǵdaiynda ómirge beiimdelý kerek. Pandemiia bastalǵannan beri biz virýsqa qarsy kúreske qatysqan meditsina qyzmetkerlerine aitarlyqtai járdemaqy tóleimiz. Bul - ýaqytsha norma, qaitalaimyn, ýaqytsha norma. Osy maqsattarǵa biz 200 mlrd teńgeden astam qarajat baǵyttadyq. Memlekettik biýdjet qarajaty basqa basymdyqtarǵa – járdemaqylarǵa, zeinetaqylarǵa, memlekettik qyzmetterge jáne t.b. jumsalýy tiis ekenin túsiný kerek» - degen Memleket basshysy dárigerlerdiń jumysy árdaiym belgili bir kásibi qaýip-qatermen bailanysty ekenin eske saldy.
Sondai-aq, Prezident vaktsinalaý deńgeiiniń ósýine bailanysty ústemeaqylar epidemiologiialyq jaǵdaiǵa qaramastan, qoldanystaǵy júieli qoldaý jáne yntalandyrý sharalarymen birtindep aýystyrylýy kerektigin aitty.
«Densaýlyq saqtaý ministrligi erekshe jáne ziiandy eńbek jaǵdailarynda jumys isteitin dárigerlerdi qoldaýdyń nusqalaryn usyndy. Atap aitqanda, psihikalyq-emotsionaldy jáne fizikalyq belsendilik úshin jumysshylardyń jekelegen sanattaryna qosymsha tólemder men ústemeaqylar qarastyrylyp otyr. Jalaqyny birtindep arttyrýmen birge bul is-sharalar meditsina qyzmetkerlerine eńbekaqy tóleýdiń jańa júiesine negiz bolatyn edi. Úkimetke eki ai merzimde biryńǵai sheshim ázirleý tapsyrylady. Ázirge, meniń bilýimshe, biryńǵai ustanym joq», - dedi Qasym-Jomart Toqaev.
