Foto: ashyq derekkóz
Qazaqstan Respýblikasynyń Prezidenti meditsina qyzmetkerlerine qatysty zorlyq-zombylyq úshin jaýapkershilikti qatańdatýǵa baǵyttalǵan Qylmystyq jáne Qylmystyq is júrgizý kodeksterine ózgerister engizý týraly zańǵa qol qoidy, dep habarlaidy Ult.kz.
Qujat Memleket basshysynyń meditsina qyzmetkerlerine fizikalyq kúsh kórsetý jáne qatygezdik tanytý faktilerine qatań quqyqtyq tosqaýyl qoiý jónindegi tapsyrmasy aiasynda ázirlengen. Zań jobasy Qylmystyq kodekske meditsina qyzmetkerleriniń, sondai-aq jedel járdem brigadalary júrgizýshileriniń qyzmettik mindetin atqarý kezinde olardyń ómiri men densaýlyǵyna qol suqqany úshin qylmystyq jaýapkershilik kózdeitin jańa bap engizýdi qarastyrady.
Jańa normalarǵa sáikes, zorlyq-zombylyq qoldanamyn dep qorqytqany úshin 200-den 500 ailyq eseptik kórsetkishke deiin aiyppul salý, túzeý nemese qoǵamdyq jumystarǵa tartý, sondai-aq eki jylǵa deiin bas bostandyǵyn shekteý ne aiyrý jazasy belgilenedi. Aýyrlatatyn mán-jailar bolǵan jaǵdaida jaza 2 jyldan 3 jylǵa deiin kúsheitiledi.
Al ómir men densaýlyqqa qaýipti emes zorlyq-zombylyq úshin 500-den 1000 AEK-ke deiin aiyppul nemese 2 jyldan 3 jylǵa deiin bas bostandyǵyn shekteý ne aiyrý jazasy kózdelgen. Ómirge jáne densaýlyqqa qaýipti kúsh qoldanǵan jaǵdaida kináli tulǵalar 5 jyldan 10 jylǵa deiin, al aýyrlatatyn jaǵdailarda 7 jyldan 12 jylǵa deiin bas bostandyǵynan aiyrylady.
Sonymen qatar Qylmystyq is júrgizý kodeksine engizilgen ózgeristerge sáikes, bul sanattaǵy ister boiynsha aldyn ala tergeý júrgizý ishki ister organdarynyń quzyretine beriledi.
Prezident meditsina qyzmetkerleriniń qaýipsizdigi men ál-aýqatyna nuqsan keltiretin mundai áreketter «Zań jáne tártip» qaǵidaty aiasynda qatań túrde toqtatylýy tiis ekenin atap ótti.
Densaýlyq saqtaý ministrliginiń málimetinshe, 2019 jyldan beri elde meditsina qyzmetkerlerine shabýyl jasaýdyń 280-nen astam faktisi tirkelgen. Al biyldyń ózinde mundai 58 jaǵdai oryn alǵan.
