Memleket basshysy Májilis tóraǵasy Erlan Qoshanovty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke Parlament Májilisiniń spikeri palatanyń VII shaqyrylymynyń úshinshi sessiiasy aiasynda atqaryp jatqan zań shyǵarý jumystary týraly baiandady.
Qazirgi kezde azamattardyń tólem qabiletin qalpyna keltirý jáne olardyń bankrottyǵy, qoǵamdyq baqylaý, turǵyn úi saiasatyn reformalaý týraly, sondai-aq densaýlyq saqtaý salasyna jáne qoǵamdaǵy basqa da ózekti máselelerge qatysty zań jobalary depýtattardyń qaraýynda jatyr.
Erlan Qoshanov Qasym-Jomart Toqaevqa Májilis pen qaita qurylǵan Joǵary aýditorlyq palata arasyndaǵy ózara is-áreket mehanizmderi týraly málimet berdi. Endi Parlament músheleri ortalyqtan bastap naqty aýdan, qala, aýylǵa deiingi bólingen biýdjet qarjysyn tolyq baqylai alady. Bul barlyq qarajattyń maqsatty jumsalýy men tiimdiligin saraptaýǵa múmkindik beredi.
Sondai-aq spiker Májilis janynan qurylǵan Qoǵamdyq palatanyń jumysy týraly aitty. Onyń quramyna depýtattar, sarapshylar, saiasi partiialardyń, úkimettik emes uiymdardyń ókilderi kirdi. Qoǵamdyq palatada ázirlenip jatqan zań jobalaryn qoǵamnyń suranysy men talap-tilegi turǵysynan turaqty túrde talqylaý josparlanyp otyr.
Sonymen qatar Memleket basshysyna Parlamenttiń tómengi palatasy janyndaǵy Qoǵamdyq qabyldaýdyń jumysy týraly esep berilip, Májilistiń qoǵamǵa ashyqtyǵyn arttyrý jónindegi jobalary tanystyryldy.
