Memleket basshysy Qasym-Jomart Toqaevtyń «Abai jáne XXI ǵasyrdaǵy Qazaqstan» atty kólemdi maqalasynan elimizdegi joǵary oqý oryndarynyń oqytýshylar quramy men stýdentteri óz boilaryna rýhani azyq aldy. Shymkenttegi M.Áýezov atyndaǵy Ońtústik Qazaqstan Memlekettik ýniversitetiniń rektory Dariia Qojamjarova kópshilikke tereń oi salǵan maqala týraly pikirin osylai bildirdi, dep habarlaidy QazAqparat.
Dariia Qojamjarovanyń sózinshe, Memleket basshysynyń uly aqyn, dana oishyl, qazaqtyń jańa tarihi dáýirdegi realistik jazba ádebietiniń atasy Abai jaily kólemdi maqalasy azamattarǵa, ásirese, jastarǵa memleketti syilaýdyń mán-mańyzyn túsindiredi. Abaidyń murasyna taǵy da zeiin qoiǵan abzal ekendigine erekshe toqtalyp ótedi.
«Qazaq halqynyń ult ustazy Abai (Ibrahim) óz halqymen birge mine HHI ǵasyr mejesine jetip, el-jurtymen birge emen-jarqyn jasap jatyr. Ózi kezinde aitqandai: «Óldi deýge bola ma, aityńdarshy, Ólmeituǵyn artyna sóz qaldyrǵan» degen shaiyrdyń ózi joq bolsa da sózi qaldy. Asyl sóz ólmeidi. Asyl sóz aita alǵan adam da, asyly ólmek emes. Kezinde Abaidyń shyǵarmashylyq ómirin qunttap, keiingi urpaq úshin altyn sandyqqa salyp, amanat qyp berip ketken M.Áýezov óziniń ataǵy álemge jaiylǵan «Abai joly» roman-epopeiasynda: «Altyn terek, arsyǵa qulash urǵan ardaqty azamat, sen ólmeisiń! Elińniń jalǵyz jan, eń sońǵy uly ma, qyzy ma, eń keiingi násili birde-bir jan bolsa, sonyń da keýdesinde seniń atyń birge ketedi. Seniń tirligiń birge jasaidy, seniń nuryń birge jarqyraidy! Aldyń jarqyn, óziń solai senip eń… Ana jurtyń seni óldi demeidi…» dep aityp ketken bolatyn»,- deidi Dariia Qojamjarova.
Rektordyń aitýynsha, búginde OQMÝ ǵalymdary Abaidyń jurtqa beimálim keibir týyndylaryn zerttep júr. Óitkeni Abaidy tereń tanýǵa basa mán berý arqyly adamnyń ózin-ózi tanýyna bolady. Adamnyń ózin-ózi tanýy jáne únemi damyp otyrýy, ǵylymǵa, bilimge basymdyq berýi – kemeldiktiń kórinisi ispettes.
