Memleket basshysy Prezident janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń tóraǵasy Lázzat Ramazanovany qabyldady, dep habarlaidy Aqordanyń baspasóz qyzmeti.
Qasym-Jomart Toqaevqa Ulttyq komissiianyń atqarǵan jumystary jáne aldyńǵy kezeńge arnalǵan josparlary týraly esep berildi.
Kezdesýde otbasy institýtyn nyǵaitýǵa, otbasylyq qundylyqtardy saqtaýǵa, áielder men balalarǵa qatysty zorlyq-zombylyqqa jol bermeýge, áleýmettik máselelerdi sheshýge baǵyttalǵan zańnama normalaryn jetildirý máseleleri qarastyryldy.
Memleket basshysynyń pikirinshe, zań jobasyn pysyqtaýǵa ortalyq jáne jergilikti atqarýshy organdardyń bári jumyldyrylýy tiis. Otbasy institýtyn barlyq deńgeide nyǵaitý máseleleri boiynsha mekemearalyq ózara is-qimyldyń tiimdi reglamentin ázirleý qajet.
Prezident áielder isteri jáne otbasylyq-demografiialyq saiasat jónindegi aimaqtyq komissiialardyń jumys isteý tásilderine engizilip otyrǵan usynystardy qoldap, olarǵa azamattyq qoǵammen tyǵyz bailanys ornatý qajet ekenin atap ótti. Otbasylyq jáne genderlik saiasat tujyrymdamasyn iske asyrý aiasynda alǵa qoiylǵan maqsattar men mindetterge qol jetkizý úshin óńir ákimderine úlken jaýapkershilik júktelýi tiis.
Kezdesýde elimizdiń qoǵamdyq-saiasi ómirine áielderdiń aralasý máselesi qozǵaldy. Memlekettik organdardaǵy, kvazimemlekettik jáne korporativtik sektorlardaǵy áielderdiń teń quqyqtary men múmkindikterin saqtaý olardyń qyzmetiniń tiimdiligin baǵalaýdyń negizgi sharty men kórsetkishteriniń biri bolýy tiis.
Sonymen qatar Qasym-Jomart Toqaev óńirlik deńgeidegi qoǵamnyń áleýmettik máselelerin sheshýge áielderdi jumyldyrý jobasyn oń baǵalady.
