Memleket basshysy Qasym-Jomart Toqaev qýańshylyqtan zardap shekken sharýalarǵa qoldaý kórsetý úshin birqatar tapsyrma berdi, dep habarlaidy QazAqparat.
«Ókinishke qarai, bizdiń elimizden bólek, basqa aimaqtardaǵy aýa raiy da qolaisyz bolyp tur. Sonyń saldarynan kórshiles memleketterde jem-shópke degen suranys kúrt artýy múmkin. Úkimetke «Atameken» ulttyq palatasymen birlesip, jedel túrde jem-shópti syrtqa shyǵarýǵa ýaqytsha tyiym salýdy qarastyrýdy tapsyramyn. Anaǵurlym zardap shekken fermerlerdi qoldaý úshin Úkimetti, ákimdikterdi jáne damý institýttaryn nesielerdi qaita qurylymdaý jáne jem-shópke qosymsha sýbsidiialar bólý jumystary kútip tur», - dep atap ótti Prezident Úkimettiń keńeitilgen otyrysynda.
Sondai-aq, ákimdikter men áleýmettik kásipkerlik korporatsiialary jáne QR AShM jedel túrde ózge óńirlerden jem-shóp satyp alý úshin jeńildikti qarjylandyrýmen qamtamasyz etý kerek.
«Bul problema qaitalanady. Sondyqtan, jedel sharalardan basqa salany jem-shóppen qamtamasyz etýdi arttyrý boiynsha júieli sharalar qajet. Jem-shóp jinaý jabdyǵyn sýdsidiialaýdy jetildirý, egin men qospa jemge arnalǵan ónimderdi satyp alý kólemin ulǵaitý qajet. Úkimet pen damý institýttary jem-shóp óndirisi kezinde qýańshylyqtan saqtandyrýdyń qoljetimdiligin jaqsartý men arttyrý boiynsha sharalar qabyldaýy kerek», - deidi Prezident.
Sonymen birge, Úkimet tarapynan, memlekettik jáne salalyq institýttardan boljaý qyzmeti asa qajet.
«Aýyl sharýashylyǵy úshin jem-shóp – óndiris, iaǵni biznesti júrgizý faktorlarynyń biri ekenin umytpaý kerek. Biz naryqtyq álemde ómir súrip jatyrmyz, onyń jaǵymdy jáne jaǵymsyz jaqtary bar. Sondyqtan fermerler jem-shóppen qamtý máselesine asqan jaýapkershilikpen qaraýy tiis. Aýyl sharýashylyǵy ministrligi ásirese memlekettik sýbsidiia alý boiynsha monitoringti kúsheitýi tiis. Bul ádiletti», - dedi Q. Toqaev.
Aita keteiik, Qasym-Jomart Toqaev Úkimettiń keńeitilgen otyrysynda óńirlerdegi qýańshylyqta tiisti jumys atqarmaǵany úshin Aýyl sharýashylyǵy ministrin otstavkaǵa jiberdi.
