Prezident koronavirýs jaǵdaiyna qatysty kezekti televiziialyq úndeý jariialaidy, dep habarlaidy "Ult aqparat".
Bul jóninde Prezidenttiń baspasóz hatshysy Berik Ýáli málim etti.
«Sońǵy kezderi Qazaqstan Prezidentiniń jumys kestesi meilinshe ózgergeni jasyryn emes. Elimizde Tótenshe jaǵdai engizildi, osyǵan bailanysty Qasym-Jomart Kemelulynyń jumys kestesi de Tótenshe jaǵdai rejimine kóshti. Prezidentke keletin shuǵyl ári saraptamalyq aqparattardyń sany kúrt ósti. Al buǵan der kezinde jaýap berip, shara qoldaný kerek. Memleket basshysy jańartylǵan formatta jumys istep jatyr. Búginde kóptegen jiyndar men kezdesýler video bailanys arqyly ótkizilýde. Koronavirýsqa qarsy kúres – kún tártibinde qarastyrylatyn negizgi másele. Qasym-Jomart Kemeluly kún saiyn Úkimettiń, Tótenshe jaǵdai jónindegi memlekettik komissiia músheleriniń, óńir basshylarynyń esepterin tyńdaidy. Jaqynda ǵana Prezident barlyq oblystardyń jáne respýblikalyq mańyzy bar qalalardyń ákimderine telefon shalyp, shaǵyn jáne orta biznesti qoldaýǵa, halyqty áleýmettik qorǵaýǵa, kóktemgi egis naýqanyna jáne sý tasqynyna qarsy jumystarǵa bailanysty naqty tapsyrma berdi», - dep jazdy Berik Ýáli.
Elimizdegi jáne álemdegi epidemiologiialyq ahýal únemi ózgerýde. Jýyrda túsken aqparattar negizinde Tótenshe jaǵdai rejiminiń jáne karantin sharalarynyń uzartylýyna qatysty tiisti sheshim qabyldanatyn bolady.
«Osy rette Memleket basshysy daǵdarysqa qarsy menedjmentten bólek, strategiialyq josparlaýǵa da mán berip otyrǵanyn este ustaýymyz kerek. Erte me, kesh pe, Tótenshe jaǵdai bitedi. Sodan keiin aldymyzdan ekonomikanyń qurylymyn qaita qaraý mindeti shyǵady. Sondyqtan aldymyzǵa orta jáne uzaq merzimge arnalǵan jańa maqsattar qoiý kerek. Prezident kóptegen baǵdarlamalar men tujyrymdamalardy jańartý qajettigin aitty. Munai baǵasynyń birden quldyraýy ekonomika men qarjy sektoryna reforma júrgizip, indýstriialandyrý men tsifrlandyrýdy naqty júzege asyrý kerek ekenin kórsetip otyr. Densaýlyq saqtaý jáne bilim salalaryn da úlken ózgeris kútip tur. Memleket basshysy jańa talaptarǵa jaýap beretin strategiialyq sheshimder ázirleýdi tapsyrdy. Halyqaralyq bailanystarǵa keletin bolsaq, qazirgi ýaqytta bul másele negizinen telefon arqyly nemese video konferentsiia formatynda júrip jatyr. Atap aitqanda, jýyrda Eýraziialyq ekonomikalyq odaq pen Túrki tildes memleketteri yntymaqtastyq keńesiniń sammitteri onlain rejimde ótkizildi. Negizgi seriktesterimizben jáne kórshiles eldermen jedel aqparat almasý asa mańyzdy. Bir aidyń ishinde Qasym-Jomart Kemeluly Resei, Qytai, Ózbekstan, Qyrǵyzstan, Tájikstan, Izrail memleketteriniń Prezidentterimen, BUU jáne Eýropalyq odaqtyń basshylarymen, AQSh-tyń Memlekettik hatshysymen telefon arqyly sóilesti. Atalǵan kelissózder azamattarymyzdy shet elderden alyp kelýge, ózara gýmanitarlyq qoldaýǵa, úzdiksiz kólik qatynastaryn qamtamasyz etýge, azyq-túlik pen meditsinalyq qural-jabdyqtardy jetkizýge bailanysty birqatar mańyzdy máselelerdi shuǵyl ári eshqandai biýrokratiialyq kedergilersiz sheshýge múmkindik berdi», - deidi Prezidenttiń baspasóz hatshysy.
Memleket basshysy azamattarymyzdyń densaýlyǵyn saqtaý men qaýipsizdigin qamtamasyz etýdi eń basty mindet sanaidy. Ol barlyq otandastarymyzdy Tótenshe jaǵdai rejiminiń talaptaryn saqtaýǵa shaqyrady. Jaqyndarymyzdyń densaýlyǵy úshin sabyr saqtap, jaýapkershilikti sezinýimiz kerek. Qasym-Jomart Kemelulynyń aitýynsha, «halyqsyz ekonomika bolmaidy».
Sondyqtan eshkim de memlekettiń nazarynan tys qalmaidy. Prezidenttiń tikelei tapsyrmasy boiynsha azamattarǵa qoldaý kórsetý úshin biýdjetten jáne Ulttyq qordan qarajat bólinýde. Memleket basshysy osy aitylǵan máselelerdiń oń sheshilýin únemi baqylaýda ustap otyr.
Sonymen qatar kelesi aptada Prezident elimizdegi koronavirýs jaǵdaiyna qatysty kezekti televiziialyq úndeýin jariialaidy.
