Memleket basshysy Qasym-Jomart Toqaev Konstitýtsiiaǵa ózgerister men tolyqtyrý engizý týraly zańǵa qol qoidy, - dep habarlaidy "Ult aqparat" Aqordanyń baspasóz qyzmetine silteme jasap.
"Memleket basshysy "Qazaqstan Respýblikasynyń Konstitýtsiiasyna ózgerister men tolyqtyrý engizý týraly" Qazaqstan Respýblikasynyń Zańyna qol qoidy", - delingen habarlamada.
16 qyrkúiekte ótken Parlament palatalarynyń birlesken otyrysynda Konstitýtsiiaǵa ózgerister men tolyqtyrý engizý týraly zań qabyldanyp, Prezidentke qol qoiýǵa jiberilgen edi.
Sputnik Qazaqstan agenttiginiń jazýynsha, qujat bes bapqa ózgerister engizýdi jáne bir bappen tolyqtyrýdy kózdeidi. Túzetýlerdiń biri - Prezident ókilettigin jeti jylǵa deiin sozý jáne tek bir merzimge ǵana sailaý.
"Depýtattar tiisti túzetýlerdi engizýdi jedeldetip, olardy prezidenttik sailaýǵa deiin qabyldaýdy usyndy. Áitpese, olardyń paiymynsha, biyl kúzde Prezident bolyp sailanatyn adamǵa Konstitýtsiianyń qoldanystaǵy redaktsiiasynyń erejeleri boiynsha jeti jyldyq merzimge qaita sailaýǵa múmkindik beretin zańdy jaǵdailar týyndaýy múmkin. Osyǵan bailanysty zań jobasy keiinnen qaita sailaý quqyǵynsyz uzaqtyǵy jeti jyl bir prezidenttik merzim týraly erejelerdi qamtidy", - dedi Ádilet ministri Qanat Mýsin Parlament palatalarynyń birlesken otyrysynda.
Aitýynsha, bul Konstitýtsiialyq novella biliktiń monopoliialaný táýekelin edáýir tómendetedi.
"Sondai-aq Konstitýtsiianyń Prezidenttiń ókilettik merzimine jáne ony qaita sailaý jónindegi shekteýlerge qatysty erejeleriniń ózgermeitindigin belgileitin túzetý kózdelgen. Bul bolashaqta Prezident ókilettiginiń eseligin nemese merzimin ulǵaitý múmkindigin boldyrmaidy. Osylaisha, Prezidenttiń mandatyn qaita sailaný múmkindiginsiz bir merzimge shekteý týraly norma Konstitýtsiianyń ajyramas bóligine ainalady jáne keiinnen qaita qaralmaidy", - dep sendirdi Ádilet ministri.
Sonymen qatar, Konstitýtsiiaǵa el astanasynyń ataýyn "Astana" dep ózgertý týraly túzetý engiziledi.
"Elorda ataýyn ózgertý máselesin azamattar uzaq ýaqyt boiy keńinen talqylaýda. Ol kezdesýler barysynda jáne referendým kezinde azamattardyń úndeýlerinde kóterildi. Sondyqtan, qoǵamdyq pikirdi eskere otyryp, depýtattardyń bul usynysy zań jobasyna engizildi", - dedi Mýsin.
Konstitýtsiiaǵa engiziletin taǵy bir ózgeris – Konstitýtsiialyq sot sýdialaryna qatysty. Álemdik praktikaǵa sáikes, Konstitýtsiialyq sot sýdialarynyń ókilettik merzimi olardy taǵaiyndaityn adamdardyń ókilettik merziminen asyp ketýi kerek. Mysaly, Germaniia, Italiia, Ispaniia, Portýgaliia jáne basqa da birqatar eldiń konstitýtsiialyq sottary osylai qalyptasady.
Osyǵan bailanysty zań jobasynda Konstitýtsiialyq sottyń sýdialaryna qaita taǵaiyndalýǵa shekteý qoia otyryp, olardyń ókilettik merzimin segiz jylǵa deiin ulǵaitý kózdelgen.
