Memleket basshysy Qasym-Jomart Toqaev Májilistiń jalpy otyrysynda kedendegi tártipti qamtamasyz etýdi tapsyrdy, dep habarlaidy QazAqparat.
«Kedende, ásirese Qytaimen shekarada tártip ornatýdyń astarynda biýdjetke kiristi arttyrýdyń mańyzdy áleýeti jatyr. Onda bolyp jatqan naǵyz bylyqtar bárine málim. Mashinalar tolyq tekserilmeidi, salyqtar men bajdar tólenbeidi, Qytaidyń keden organdarymen salystyrmaly statistikasyndaǵy sáikessizdik milliardtaǵan dollarǵa jetedi. Qandai da bir qol suǵylmaityn mártebesi bar ýákiletti operatorlar bar. Elimiz salyq túrindegi ondaǵan milliard teńgeni joǵaltýda. Bulai jalǵasa berýine bolmaidy», - dedi Prezident.
Memleket basshysy Bas prokýratýraǵa Qarjy ministrligimen, Qarjy monitoringi agenttigimen jáne basqa da múddeli organdarmen keshendi tekserý júrgizip, keden shekarasyndaǵy tártipti qamtamasyz etýdi tapsyrdy.
