Memleket basshysy Qasym-Jomart Toqaev qazaqstandyqtardy Jeńis kúnimen quttyqtady, - dep habarlaidy Aqorda.
***
Qurmetti otandastar!
Barshańyzdy Uly Otan soǵysyndaǵy Jeńistiń 75 jyldyǵymen shyn júrekten quttyqtaimyn!
Bul mereili mereke qanquily jaýdy kúirete jeńip, týǵan jerin qorǵap qalǵan ákelerimiz ben atalarymyzdyń óshpes erligin dáripteidi.
Qazaqstandyqtar qiyn-qystaý kezeńde batyrlyq pen janqiiarlyqtyń jarqyn úlgisin kórsetti. Maidanǵa attanǵan 1 million 200 myń azamatymyzdyń jartysy elge oralǵan joq.
Talǵat Bigeldinov, Sergei Lýganskii, Leonid Beda, Áliia Moldaǵulova, Mánshúk Mámetova, Ivan Pavlov, Baýyrjan Momyshuly, Saǵadat Nurmaǵambetov, Málik Ǵabdýllin, Hiýaz Dospanova, Raqymjan Qoshqarbaev jáne basqa dańqty batyrlarymyzdyń esimderi máńgi este saqtalady.
Soǵys jyldarynda Qazaqstanǵa kóshirilgen júzdegen óndiristik jáne ónerkásiptik kásiporyndarda myńdaǵan otandasymyz eńbek etip, Uly Jeńisti jaqyndatýǵa úles qosty. Árbir on oqtyń toǵyzy Qazaqstanda óndirilgen qorǵasynnan quiyldy. Aýyl halqy jaýyngerlerdi azyq-túlikpen qamtamasyz etý úshin aianbai ter tókti.
Biz erjúrek aǵa býynnyń aldynda máńgi qaryzdarmyz. Olardyń qaisarlyǵy men tózimdiliginiń, tabandylyǵy men patriottyǵynyń arqasynda beibit zamanda ómir súrip, jarqyn bolashaǵymyzǵa jol ashtyq.
Biyl mereke kúni ózgeshe ahýalǵa tuspa-tus kelse de maidangerlerdiń eshbiri eleýsiz qalǵan joq.
Ardagerlerimizge myqty densaýlyq jáne baq-bereke tileimin!
Elimizde árdaiym beibitshilik pen tynyshtyq bolsyn!
