Foto: Aqorda
Memleket basshysy Qasym-Jomart Toqaev Qazaqstan halqyn Jeńis kúnimen quttyqtady, dep habarlady Aqorda.
Qurmetti otandastar!
Sizderdi Uly Jeńistiń 80 jyldyǵymen shyn júrekten quttyqtaimyn!
Osy mereili kúndi elimizdiń árbir azamaty erekshe kóńil-kúimen qarsy alyp, Jeńimpaz aǵa býynǵa sheksiz rizashylyǵyn bildiredi.
Fashizmge qarsy surapyl soǵys halqymyzǵa orasan zor qaiǵy-qasiret ákeldi. Bizdiń qaharman jaýyngerlerimiz asqan erlik pen batyldyq tanytyp, azattyq pen ádildik jolynda aianbai kúresti. Júz myńdaǵan sarbazymyz urys dalasynda qaza tapty. Tyldaǵy jurt ta adam aitqysyz qiyndyqqa qaramastan tynymsyz ter tógip, Jeńisti jaqyndatýǵa ólsheýsiz úles qosty. Olar egis alqabynda, zaýyttar men fabrikalarda kún-tún demei jumys istep, maidandy qamtamasyz etti.
Biz otandastarymyzdyń qaitpas qaisarlyǵy men qajyrly eńbegin eshqashan umytpaimyz. Janqiiarlyq pen erliktiń ozyq úlgisin kórsetken batyrlarymyzdyń esimin árdaiym ulyqtaimyz. Ardagerlerimizge qamqorlyq jasap, qoldaý bildiremiz.
Qazaqstanda Jeńis kúnine orai kóptegen is-shara ótkizilip jatyr. Elimiz boiynsha bes júzge jýyq kósheni qaharman erlerimizdiń atymen ataý týraly sheshim qabyldandy. Aýqymdy áskeri sherý ótti. Munyń bári zulmat soǵystyń zardabyn halqymyz eshqashan jadynan shyǵarmaýy úshin qajet.
Biz Jeńis kúninde beibit ómirdiń qadirin uǵynyp, dostyq pen tynyshtyqtyń mańyzdylyǵyn tereń túsinemiz. Osy myzǵymas qundylyqtar árdaiym halqymyzdyń ál-aýqatyn arttyrýdyń jáne Qazaqstandy turaqty damytýdyń berik negizi bolyp qala beredi. Men buǵan kámil senemin.
Qadirli ardagerlerimizge jáne barsha otandastarymyzǵa zor densaýlyq, baq-bereke tileimin!
Uly Jeńis kúni qutty bolsyn!
