Foto: Aqorda
Prezident Qasym-Jomart Toqaev ShYU-ǵa múshe memleketter basshylary keńesiniń otyrysynda sóz sóiledi, dep habarlaidy Aqordanyń baspasóz qyzmeti.
Memleket basshysy Sammitti joǵary deńgeide uiymdastyrǵany jáne tarihy bai Tiantszin qalasynda jyly qarsy alǵany úshin QHR Tóraǵasy Si Tszinpinge rizashylyq bildirdi.
— Qurmetti Si Tszinpin myrza, Sizdi jáne barsha qytailyq dostarymyzdy elderińizdiń Shanhai yntymaqtastyq uiymyna tabysty tóraǵalyq etýimen quttyqtaimyn. Qazaqstan ShYU sheńberindegi qaýipsizdik pen turaqtylyqty, ekonomikalyq yqpaldastyq jáne mádeni-gýmanitarlyq bailanystardy nyǵaitýǵa baǵyttalǵan Qytaidyń sarabdal saiasatyn joǵary baǵalaidy. Qytaidyń japon basqynshylyǵyna qarsy kúrestegi jeńisiniń 80 jyldyǵy jáne Ekinshi dúniejúzilik soǵystaǵy jeńistiń 80 jyldyǵy sekildi qos tarihi mereitoi qarsańynda ótip jatqan búgingi Sammitke erekshe mán beremiz. Bul aitýly datalar barsha adamzatqa jer betindegi halyqtyń berekeli ómir súrýine, birligi men yntymaǵyn arttyrýǵa qyzmet etýi qajet. Sondai-aq tarihi shyndyqty burmalaýǵa jol bermei, óskeleń urpaqty patriotizm rýhynda tárbielep, shynaiy qundylyqtardy ustanýǵa úndeýi kerek, — dedi Prezident.
Qasym-Jomart Toqaev Shanhai yntymaqtastyq uiymyn álemdik qaýymdastyq tiimdi, yqpaldy ári qajetti halyqaralyq qurylym retinde tanitynyn atap ótti.
— Qazaqstan ShYU-nyń teńgerimdi kóppoliarli álemdik tártip ornatý, qaýipsizdik pen turaqtylyqty qamtamasyz etý, memleketterdiń ishki isine aralaspaý jáne egemendi damý quqyǵyn moiyndaý, sondai-aq ádil halyqaralyq saýda men ózara tiimdi investitsiialyq yntymaqtastyq sekildi basty maqsattaryn tolyq qoldaidy. Uiymnyń basym mindetteri jańa tehnologiialyq dáýirde halyqtarymyzdyń ál-aýqatyn, qaýipsizdigin jáne ornyqty damýyn qamtamasyz etýdi kózdeidi. ShYU jarǵylyq qujattarynyń negizgi qaǵidattaryn berik ustana otyryp, Qazaqstan «úsh zulymdyqqa», iaǵni, terrorizmge, separatizmge jáne dini ekstremizmge qarsy kúreste kúsh-jiger biriktirýdi óte ózekti sanaidy. Biz jahandyq beibitshilik pen qaýipsizdik múddesi úshin halyqaralyq yntymaqtastyq nyshanyna ainalǵan «Shanhai rýhyn» odan ári ilgeriletýdi qýattaimyz, — dedi Memleket basshysy.
Aita keteiik, 30 tamyzda Prezident Qasym-Jomart Toqaev Shanhai yntymaqtastyq uiymynyń sammitine qatysý úshin Tiantszin qalasyna bardy.
Memleket basshysy QHR Tóraǵasy Si Tszinpinmen kelissóz júrgizdi.
Keshe Prezident ShYU sammitine qatysýshy elderdiń delegatsiia basshylary qurmetine uiymdastyrylǵan saltanatty qabyldaý rásimine qatysý úshin Tiantszindegi «Meitszian» konferents-ortalyǵyna barǵany belgili boldy.
Búgin sammit qarsańynda ShYU-ǵa múshe memleketter basshylary keńesine qatysýshylar birge sýretke tústi.
