Qazaqstan syrtqy saiasatta beibit ári kópvektorly baǵytty ustanýyn jalǵastyra beredi. Bul týraly búgin Aqordada Qazaqstanda tirkelgen diplomatiialyq missiialar men halyqaralyq uiymdardyń basshylarymen kezdesý barysynda Elbasy Nursultan Nazarbaev aitty, dep habarlaidy QazAqparat tilshisi.
«Qazaqstan búgin álemniń 184 memleketimen diplomatiialyq bailanys ornatyp, 57 Elshiligi men turaqty ókildigin óz elordasynda ashty. Bizde sheteldiń 98 Elshiligi men halyqaralyq uiymdardyń ókildigi bar. Elimiz syrtqy saiasatta beibit ári kópvektorly baǵytty ustanýyn jalǵastyra beretin bolady», - dedi Nursultan Nazarbaev.
Elbasy Qazaqstan Resei Federatsiiasymen dostyq qatynastaryn ekijaqty formatta jáne Eýraziialyq ekonomikalyq odaq aiasynda damytyp kele jatqanyn aitty.
«Jaqynda Petropavl qalasynda Resei Prezidenti Vladimir Pýtinmen birge óńiraralyq yntymaqtastyǵymyzdyń 15-shi forýmyn tabysty ótkizdik. QHR-men ózara senimge jáne syilastyqqa negizdelgen jan-jaqty strategiialyq seriktestigimiz turaqty damyp keledi. Qazaqstan óz tarapynan barlyq sharany qoldanatyn bolady. Beijińge 7-8 maýsymdaǵy memlekettik saparym eki el arasyndaǵy saiasi jáne ekonomikalyq yntymaqtastyqty tereńdetýge tyń serpin berdi dep sanaimyn», - dedi Memleket basshysy.
QR Prezidenti osy jyldyń qańtar aiyndaǵy Vashingtonǵa jasaǵan resmi sapary jáne Prezident Donald Tramppen kelissózderi barysynda Qazaqstan men AQSh-tyń 21 ǵasyrdaǵy keńeitilgen strategiialyq seriktestigi jónindegi ýaǵdalastyqqa qol jetkizilgenin aitty.
«Kelisilgen máseleler óz retimen sheshilip keledi. Eki memleket arasyndaǵy ekonomikalyq yntymaqtastyqty odan ary nyǵaitý máseleleri AQSh Saýda ministri Ýilber Rosstyń Qazaqstanǵa jaqyndaǵy sapary barysynda egjei-tegjeili qarastyryldy», - dedi Elbasy.
Nursultan Nazarbaev Ortalyq Aziia óńiri Qazaqstannyń syrtqy saiasi basymdyqtarynda mańyzdy ról atqaratyndyǵyn da basa aitty.
«Bizdiń tyǵyz yntymaqtastyǵymyz elderimizdiń ekonomikalyq ál-aýqatyn arttyrýǵa, óńirlik qaýipsizdik pen turaqtylyqty nyǵaitýǵa, sondai-aq tarihi jáne mádeni bailanystardy odan ári damytýǵa barynsha múmkindik beredi», - dedi Memleket basshysy.
