Foto: Aqordanyń baspasóz qyzmeti
1996 jyly Prezident Jarlyǵymen 1 mamyr – Qazaqstan halqynyń birligi kúni bolyp bekitilgen. 1995 jylǵy 1 naýryzda Qazaqstan halqy Assambleiasy quryldy. Jýyrda ótken Assambleianyń HHHIV sessiiasynda Memleket basshysy Qasym-Jomart Toqaev Qazaqstan halqy Assambleiasynyń 30 jyldyǵy — egemendik tarihyndaǵy aitýly oqiǵa ekenin aitty.
Biyl 20,3 million qazaqstandyq bul meiramdy tatýlyq pen dostyqtyń belgisi retinde atap ótedi. Ulttyq statistika biýrosynyń málimeti boiynsha Qazaqstan halqynyń jalpy sany – 20 316 155 adam. Bir shańyraq astynda túrli ult pen etnos ókilderi beibit ómir súrip jatyr:
Qazaqtar – 14 456 709
Orystar – 2 963 938
Ózbekter – 678 487
Ýkraindar – 371 807
Uiǵyrlar – 305 648
Nemister – 223 272
Tatarlar – 218 926
Ázirbaijandar – 155 364
Kárister – 120 686
Túrikter – 91 732
Dúngender– 86 067
Belarýstar – 74 389
Tájikter – 58 712
Kúrdter – 51 171
Qyrǵyzdar – 40 200
Osy oraida, Memleket basshysy Qasym-Jomart Toqaev Qazaqstan halqynyń birligi merekesimen quttyqtap, barshaǵa baq-bereke tiledi. Bul týraly Aqordanyń baspasóz qyzmeti habarlady.
Memleket basshysy Qasym-Jomart Toqaevtyń Qazaqstan halqynyń birligi merekesimen quttyqtaýy:
Qurmetti otandastar!
Qazaqstan halqynyń birligi merekesi qutty bolsyn!
Bul – memleketimiz úshin airyqsha máni bar meiram. Jurtymyz ortaq qundylyqtarǵa negizdelgen jasampaz maqsattarǵa jetý jolynda bar kúsh-jigerin jumyldyryp, bolashaqqa senimmen qadam basyp keledi.
Keń baitaq jerimizde túrli etnos ókilderi ózara kelisimde, tatý-tátti ómir súrip jatyr.
Biyl Qazaqstan halqy Assambleiasynyń qurylǵanyna 30 jyl toldy.
Osy biregei uiym áýel bastan elimizdegi beibitshilik pen tatýlyqtyń jarshysyna ainaldy. Assambleia azamattarymyzdyń ózara qurmeti men yrysty yntymaǵyna súienip, ultty uiystyrýǵa eleýli úles qosyp keledi.
Halqymyzdyń aýyzbirshiligi men tileýlestiginiń arqasynda memleketimiz damyp, qolǵa alynǵan aýqymdy reformalar tabysty júzege asyryla beredi.
Elimiz teńdikke, ózara senimge jáne mádeni áralýandylyqtyń jasampaz áleýetine arqa súiep, el birligin odan ári nyǵaita túsedi.
Biz jurt bolyp jumyla bilsek, kez-kelgen synaqty eńserip, biik belesterdi baǵyndyramyz.
Ultymyzdyń arman-muraty – Ádiletti ári Qýatty Qazaqstandy birge quramyz.
Barshańyzǵa baq-bereke tileimin! Birligimiz bekem, aspanymyz ashyq bolsyn!
