Qazaqstan Prezidenti dástúr boiynsha Elorda kúnine arnalǵan merekelik is-sharany ashatyn Memlekettik týdy kóterý saltanatty rásimine qatysty, dep habarlaidy "Ult aqparat" Aqordaǵa silteme jasap.
– Qazaqstannyń týy joǵary áýelep kóterilgende júregimizdi táýelsiz elimizdiń barlyq jetistigine degen maqtanysh sezimi baýrap alady. Bas qalamyz qalyptasqan sátten bastap, damýdyń qazaqstandyq úlgisiniń aiqyn jetistikke jetkenin kórsetip keledi – dedi Qasym-Jomart Toqaev.
Memleket basshysy áskeri oqý orny túlekteriniń aldynda sóilegen sózinde Qazaqstannyń týyn óńirde jáne búkil jer sharynda qaýipsizdik pen turaqtylyqty qamtamasyz etýge baǵyttalǵan beibitshilik pen saliqaly saiasattyń simvoly retinde búkil álem biletinin aitty.
– Qazirgi kúrdeli jahandyq ahýalda bizdiń er azamattarymyz túrli shielenis oshaqtaryna baryp, bitimgerlik missiiasyn abyroimen atqarýda. Bilikti áskeri qyzmetker adamgershilik qundylyqtaryn biik ustaityn, temirdei tártipti saqtaityn, tabandy eńbek etetin adam bolýy tiis. Qazaqstannyń qaýipsizdigi – Sizderdiń sapaly jumystaryńyzǵa tikelei bailanysty, – dedi Qasym-Jomart Toqaev.
Rásim barysynda joǵary áskeri oqý ornynyń 27 úzdik túlegi Qazaqstan Prezidenti – Qazaqstan Respýblikasynyń Joǵarǵy Bas qolbasshysynyń qolynan ofitser pogonyn aldy.
Sońynda Qasym-Jomart Toqaev barlyq qatysýshylardy kele jatqan Elorda kúnimen quttyqtap, Qazaqstan halqyna beibitshilik pen baq-bereke tiledi.
