Foto: Aqorda
Memleket basshysy Qasym-Jomart Toqaev Qazaqstan halqyn Oraza ait merekesimen quttyqtady. Bul týraly Aqorda málim etti.
— Qadirli otandastar! Oraza ait meiramy qutty bolsyn! Tatýlyq pen baýyrmaldyq, jaqsylyq pen igilik saltanat quratyn osy qasterli merekeniń barsha musylman qaýymy úshin mán-mańyzy airyqsha. Ramazan aiynda imandylyqqa, rýhani tazarýǵa umtylǵan jurtymyz Ait kúni aq dastarhan jaiyp, qonaqjailyq kórsetedi. Bir-birine izgi tilegin arnaidy. Muqtaj jandarǵa kómek qolyn sozyp, qamqorlyq tanytady. Sol arqyly adamgershilik qundylyqtar qoǵamymyzda tereń ornyǵa túsedi. Oraza ait merekesiniń taǵylymy ata saltymyzben tereń sabaqtasyp jatyr. Bizdiń dinimiz de, dástúrimiz de azamattardy birlik pen yntymaqqa úndeidi, ózara syilas bolýǵa shaqyrady. Osy qasietterimiz barda halqymyzdyń Ádiletti, Qaýipsiz, Taza ári Qýatty Qazaqstandy qurý týraly arman-muraty oryndalatynyna kámil senimdimin. Barshańyzǵa baq-bereke tileimin! Ár shańyraqqa qut-bereke darysyn! Ait qabyl bolsyn, aǵaiyn! , — delingen habarlamada.
Aita keteiik, búgin jer betindegi barlyq musylman qaýymy úshin eń qasietti sanalatyn eki ulyq merekeniń biri — Oraza ait meiramy toilanady.
