Foto: Aqorda
Kezdesýde Qazaqstan men Reseidiń túrli baǵyttaǵy ekijaqty seriktestigi jáne óńirlik qaýipsizdik boiynsha yntymaqtastyq máseleleri talqylandy, dep habarlaidy Ult.kz.
Prezident eki el arasyndaǵy yntymaqtastyqty nyǵaitý turǵysynan bul sapar asa mańyzdy ekenin jetkizip, Resei Prezidenti Vladimir Pýtinge sálem joldady.
"Qarym-qatynasymyz qarqyndy damyp keledi. Bul rette Resei Federatsiiasy Prezidentiniń byltyr qarasha aiynda Qazaqstanǵa jasaǵan memlekettik sapary airyqsha mánge ie. Elderimizdiń ekonomikalyq bailanystary tabysty ilgerilep kele jatyr. 171 joba boiynsha ýaǵdalastyqqa qol jetkizdik. Onyń ishinde 50-den astam joba júzege asyrýdyń sońǵy kezeńine jetti. Búginde Resei Qazaqstan ekonomikasynyń negizgi investorlarynyń birine ainaldy. Memleketterimizdiń quqyq qorǵaý organdary, áskeri vedomstvolarynyń arasyndaǵy bailanys ta oidaǵydai órkendeidi dep sanaimyn. Meniń oiymsha, Sizdiń saparyńyz ekijaqty yqpaldastyǵymyzǵa sholý jasap, ózara is-qimyldyń jańa baǵyttary boiynsha kelisimge kelýge ońtaily múmkindik beredi", – dedi Memleket basshysy.
Óz kezeginde Resei Qaýipsizdik Keńesiniń hatshysy kezdesýge jáne óńirlik qaýipsizdikke qatysty ózekti máselelerdi talqylaýǵa múmkindik jasaǵany úshin Qazaqstan Prezidentine alǵys aitty.
"Baýyrlas halyqtarymyzdyń, elderimizdiń arasynda qalyptasqan qarym-qatynasqa únemi joǵary deńgeide qoldaý kórsetiledi. Taýar ainalymy men birlesken jobalardyń aýqymy qomaqty. Árine, bizdiń bailanystarymyz tek ekijaqty qarym-qatynaspen shektelmeidi. Biz Shanhai yntymaqtastyq uiymy, UQShU, TMD jáne EAEO aiasynda belsendi jumys atqaryp kelemiz. Qazaqstannyń bastamasymen qolǵa alynǵan jobalar tabysty ári belsendi iske asyrylyp jatyr", – dedi Sergei Shoigý.
Kezdesýde eki eldiń qaýipsizdik salasyndaǵy yqpaldastyǵynyń tiimdiligin arttyrý máselesi qarastyryldy.
