Memleket basshysy Qasym-Jomart Toqaev epidemiologiialyq ahýaldy turaqtandyrý jóninde keńes ótkizdi, dep habarlaidy Aqorda.
Premer-Ministr Asqar Mamin Prezidentke 5 shildeden bastap elimizde qatań karantin sharalary engizilgennen keiin indet juqtyrýshylardyń sany 29 paiyzǵa tómendegenin baiandady. Bir kúnde indet juqtyratyn adamdardyń sany 1500-1600 aralyǵynda turaqtaǵan. Statsionarlardaǵy emdelýshilerdiń qatary 43 paiyzǵa, onyń ishinde, reanimatsiialyq palatalardaǵy naýqastar sany 27 paiyzǵa azaiǵan. Saýyǵyp shyqqandardyń sany 63 paiyzǵa deiin ósken. Jedel-járdem shaqyrý jaǵdaiy tómendegen. Osylaisha densaýlyq saqtaý júiesiniń negizgi júkteme kórsetkishin tómendetýge qol jetkizilgen.
Sonymen qatar Asqar Mamin Qasym-Jomart Toqaevqa dertke shaldyǵý jáne adam ólimi, meditsinalyq kómektiń qol jetimdiligi men sapasy, halyqtan test synamasyn alý deńgeii, intensivti terapiia jáne reanimatsiia palatalarynyń qajetti dári-dármektermen, meditsinalyq qural-jabdyqtarmen qamtamasyz etilýi sekildi negizgi kórsetkishter boiynsha óńirlerdegi ahýalǵa júrgizilgen kúndelikti monitoring jaiynda málimet berdi.
Densaýlyq saqtaý ministri Aleksei Tsoi Memleket basshysyna infraqurylym nysandarynyń epidemiologiialyq ahýalǵa jáne ekonomikaǵa áserin eskere otyryp, karantin sharalaryn kezeń-kezeńimen jeńildetý joldaryn baiandady.
Memleket basshysy koronavirýs indetine shaldyǵýshylardyń jáne sonyń saldarynan bolatyn ólim-jitimniń kórsetkishin odan ári tómendetýdiń asa mańyzdy ekenin atap ótti.
Shilde aiynda engizilgen shekteý sharalarynyń oń áserin odan ári arttyrý maqsatynda, sondai-aq, Qazaqstandaǵy jáne shekaralas memleketterdegi epidemiologiialyq jaǵdaidyń kúrdelene túsý yqtimaldyǵyn eskere otyryp, Qasym-Jomart Toqaev Memlekettik komissiiaǵa karantin sharalaryn kezeń-kezeńimen jeńildetý arqyly eki aptaǵa uzartýdy tapsyrdy.
