Qazaqstan Prezidenti Qasym-Jomart Toqaev«YDD CORPORATION» JShS-niń ferroqorytpa zaýytyna bardy, dep habarlaidy Aqorda.
Memleket basshysy joǵary sapaly ferrosilitsiia (FeSi75) óndirisimen tanysty. Bul ónimniń qospasy bolat, shoiyn qorytý kezinde metalldardyń mehanikalyq jáne korroziialyq tózimdiligin jaqsartý úshin qoldanylady.
Qasym-Jomart Toqaevqa óndiris protsesi men óndiriste, qurylysta, keme, áýe kólikterin jáne avtomobil jasaýda qoldanylatyn daiyn ónimder kórsetildi.
Zaýyttyń qýattylyǵy jylyna 180 myń tonna ónim óndirýge jetedi. Onda qoldanylatyn tehnologiia ferrosilitsiia men ferromarganets óndirýge múmkindik beredi. Jobadaǵy otandyq ónimniń úlesi 95 paiyzdan asady.
Zaýyttyń aktsionerleri E.Nyǵmatýlin, A.Kemertelidze jáne J.Appaz atalǵan jobanyń jergilikti jáne jahandyq suranysty qamtamasyz etetinin aitty. Atap aitqanda, munda óndirilgen ferrosilitsiia Qazaqstannan bólek, Eýropa, Ońtústik Shyǵys Aziia, Soltústik jáne Ońtústik Amerika elderiniń naryǵyna shyǵarylady.
Kásiporynnyń ónimi sapasy jaǵynan eń joǵary álemdik talapqa sai keledi. Pandemiia kezinde kompaniia ónimniń satylý aýmaǵyn 15 elge arttyryp, Qazaqstannyń eksporttyq áleýetin kóterýge úles qosty. Qazirgi tańda zaýyt óz ónimin álemniń 37 eline eksporttaidy.
Kompaniia COVID-19 pandemiiasynyń birinshi tolqyny kezinde jumys kestesin vahtalyq ádiske kóshirip, barlyq qajetti jaǵdai jasaǵanynyń arqasynda qazirgi óndiris kólemin saqtap qaldy.
Sonymen qatar Prezident óndiristi basqarý ortalyǵyn aralap kórip, «Qaz Qarbon» JShS-niń jańa jobasymen tanysty.
– Bul óte qajetti jáne jaqsy joba. Qutty bolsyn. Qazaqstandy indýstrialandyrýǵa qomaqty úles qosqanyn aitpaǵannyń ózinde, el ekonomikasynyń mańyzdy aktivi sanalady. Óndiristi jyldam kórip shyqtyq. Biraq buǵan qatysty úlken josparlarymyz bar. Baqylap, kómektesip otyramyz, – dedi Memleket basshysy.
Kezdesý sońynda Qasym-Jomart Toqaev ferroqorytpa zaýytynyń eńbek ujymyna tabys tiledi.
