Foto: Akorda.kz
Prezident JD com elektrondy kommertsiia alańynda Qazaqstannyń ulttyq pavilonyn ashty, dep habarlaidy "Ult aqparat" Aqordanyń resmi saityna silteme jasap.
Memleket basshysy Qasym-Jomart Toqaev biznesti onlain-keńistik arqyly júrgizý álem ekonomikasynyń mańyzdy baǵytyna ainalǵanyn aitty.
«Qazir elektrondy saýda naryǵynyń kólemi 3,5 trillion dollarǵa jetti. Bul úderis jyl saiyn artyp keledi. Halyqaralyq onlain saýda-sattyqty damytý isinde Qytai óte mańyzdy ról atqarady. Búgin álemdegi asa iri elektrondy saýda alańynda Qazaqstannyń ulttyq pavilony ashylady. Bul qadam eki eldiń alys-berisin jandandyrmaq. Byltyr Qazaqstan men Qytai arasyndaǵy taýar ainalymy 31 milliard dollarǵa jetti. Biz munymen shektelip qalmaimyz. Elektrondy kommertsiia salasyndaǵy áriptestikti odan ári damytamyz. Sonda ekijaqty saýda ainalymyn jaqyn arada 40 milliard dollarǵa jetkizýge múmkindik týady. «Tsifrly Jibek joly» bastamasy osy mindetti oryndaýǵa jol ashady», – dedi Memleket basshysy.
Aifta keteiik, JD com (Jingdong Mall) – Qytaidaǵy taýarlar men qyzmetter satýǵa arnalǵan eń iri onlain platforma. 1998 jyly negizi qalanǵan onlain riteil alańynyń 400 millionnan astam paidalanýshysy bar. 2022 jyly JD com 1 trillion iýan taza paida taýyp, Qytaidaǵy elektrondy saýda alańdarynyń arasynda birinshi orynǵa shyqqan. Qazirgi kezde platformada 40-tan asa eldiń ulttyq pavilondary jumys isteidi. Qazaqstannyń ulttyq pavilonyn ashý jóninde kelisimge biyl naýryz aiynda qol qoiyldy. Búginde ulttyq pavilonymyzda elimizdiń birneshe ónim túri satylymǵa qoiylǵan. Buǵan qosa aldaǵy ýaqytta eksporttyq áleýeti joǵary 15 otandyq azyq-túlik óndirýshisiniń ónimderin (kúnbaǵys maiy, konditer ónimderi, sýsyndar) Qytai naryǵyna shyǵarý josparlanyp otyr.
