Memleket basshysy Qasym-Jomart Toqaev Úkimettiń investitsiia tartýdyń jańa tetikterin qoldady, dep habarlaidy "Ult aqparat".
Eske sala keteiik, búgin Memleket basshysy Sheteldik investorlar keńesiniń jumys kezdesýine qatysty.
Osy jiynda Memleket basshysy Úkimettiń investitsiia tartýdyń jańa tetikteri usynylǵan baiandamasyna, onyń tiptik kelisimsharttardy jetildirý bóligine basa mán berdi.
Prezident bul usynystardy qoldap, investitsiianyń quqyqtyq turǵydan qorǵalýyn jáne turaqtylyǵyn qamtamasyz etýdi, sondai-aq, qajet jaǵdaida investitsiialyq jeńildikter jasaýǵa tiisti mehanizmderdiń bárin muqiiat pysyqtaý qajettigin aitty.
– Barlyq jobanyń geologiiaǵa, naryqtan shalǵai ornalasýyna, munai túrlerine bailanysty óz erekshelikteri bolǵandyqtan, «birkelki ádisten» qashýymyz kerek. Úkimet jobalardy kúrdeliligi men mańyzy boiynsha júielep, olardy retteýdiń jáne qoldaýdyń tiisti tetikterin aiqyndaýy qajet, – dedi Qasym-Jomart Toqaev.
Osyǵan bailanysty Memleket basshysy Úkimetke jumys tobynyń kelesi otyrysyna jetildirilgen tiptik kelisimsharttyq mehanizm ázirleýdi tapsyrdy.
Budan bólek Prezident kómirsýtegin qaita óńdeýde investitsiiany retteýdiń zamanaýi jáne ońtaily tetigin ázirleý qajettigin aitty.
Memleket basshysy jergilikti ónimdi arttyrý máselesine arnaiy toqtaldy.
Bul rette ol tehnologiia transfertin jáne óndiristi bir jerge shoǵyrlandyrýdy qamtamasyz etý úshin naqty sharalar ázirleý jóninde Úkimetke bergen tapsyrmasyn eske saldy.
