Foto: Akorda.kz
Memleket basshysy Indýstriia jáne infraqurylymdyq damý ministri Marat Qarabaevty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Kezdesýde ministrliktiń qyzmeti jáne Prezident tapsyrmalarynyń oryndalý barysy, sonyń ishinde joldardyń sapasyn jaqsartý, halyqty turǵyn úimen qamtamasyz etý máseleleri jóninde baiandaldy.
Qasym-Jomart Toqaevqa ken oryndaryna júrgizilgen tekserý jumystarynyń qorytyndysy týraly esep berildi. Marat Qarabaevtyń aitýynsha, zańbuzýshylyqtarǵa bailanysty qatty paidaly qazbalardy igerýge berilgen 200-den astam kelisimshart pen litsenziia qaitaryp alyndy.
Ministr 800-den astam jobadan turatyn jańa indýstriialyq investitsiialyq jobalar toptamasynyń iske asyrylýy týraly da baiandady.
Budan bólek, Memleket basshysyna kólik infraqurylymynyń damýy jóninde aqparat berildi. Tiisti tapsyrma boiynsha Úkimet elimizdiń kólik-logistikalyq áleýetin damytýdyń 2030 jylǵa deiingi tujyrymdamasyn bekitti. Sondai-aq tranzittik áleýetti arttyrý úshin vagon parki tapshylyǵyna qatysty másele sheshilip jatyr. "Stadler", "Alstom" jáne "Wabtec" kompaniialarynyń qatysýymen otandyq zaýyttarda vagon men lokomotiv óndirisi bastalady.
Prezidenttiń 2029 jylǵa deiingi sailaýaldy baǵdarlamasyn iske asyrý aiasynda halyqaralyq avtomobil dálizderin damytý, sonyń ishinde respýblikalyq mańyzy bar 8 myń shaqyrym avtojol salý jáne qaita jóndeý jumystary júrgizilip jatyr.
Qasym-Jomart Toqaevqa azamattyq aviatsiia salasyndaǵy turaqty ósim týraly da baiandaldy. 2022 jyly pandemiiaǵa deiingi kórsetkishke qol jetkizildi, iaǵni Qazaqstan aviakompaniialary 11 millionǵa jýyq jolaýshy tasymaldady. "Ashyq aspan" rejimi engizildi. Ushý geografiiasy keńeiip keledi. 2025 jylǵa deiin Tokio, Singapýr, Shanhai jáne Niý-Iork baǵyttaryna reister ashylady dep josparlanyp otyr.
Qasym-Jomart Toqaev orta biznesti damytý jáne shikizat sektoryna, taý-ken ónerkásibi men geologiialyq barlaý salalaryna investitsiia tartý jumystaryn kúsheitýdi tapsyrdy.
Sonymen qatar, Prezident jol boiyndaǵy, sondai-aq áleýmettik, injenerlik jáne kommýnaldyq infraqurylymdardy jańǵyrtýǵa erekshe nazar aýdarýdy, óndiristegi otandyq úlesti arttyrý jumysyn kúsheitýdi jáne Qala qurylysy kodeksin ázirleýdi jedeldetýdi talap etti.
