Qazaqstan Prezidenti Qasym-Jomart Toqaev 2020 jylǵy joldaýy barysynda ǵylym salasyn damytý úshin birqatar tapsyrma berdi. Onyń ishinde jyl saiyn álemniń jetekshi ǵylymi ortalyqtarynan 500 qazaqstandyq ǵalym taǵylymdamadan ótedi, - dep habarlaidy «Ult aqparat».
Sondai-aq, Qazaqstandaǵy ǵylymdy damytý úshin tyń kózqaras pen jańa tásilder kerek ekenin basa aitty. Prezidenttiń aitýynsha, ol úshin halyqaralyq tájiribege arqa súieý kerek.
Prezident joldaýynda: "Úkimetke jyl saiyn álemniń jetekshi ǵylymi ortalyqtarynda 500 ǵalymnyń taǵylymdamadan ótýin qamtamasyz etýdi, sondai-aq, "Jas ǵalym" jobasy aiasynda zertteý júrgizý úshin myń grant bólýdi tapsyramyn", – dedi memleket basshysy.
Qazaqstanda ǵylym salasyn qarjylandyrý negizinen iri kásiporyndardyń, ásirese, shikizat salasyndaǵy kompaniialardyń qarajaty esebinen júrgiziledi. Al memleket basshysy qazir qoldanystaǵy norma talaptary saqtalmai otyrǵanyn aitty. Sebebi iri kásiporyndardyń, kompaniia tabysynyń bir paiyzyn ǵylym men tehnologiiany damytýǵa bólinýi qajet.
Prezident kóp jaǵdaida bul qarajat kompaniialardyń ishinde bóliniske túsip ketetinin aitty. Úkimetke osy qarajatty jinaqtaý isin ortalyqtandyrýdy tapsyrdy. Memleket basshysy tapsyrmasynan keiin kompaniia tabysynyń bir paiyzy biýdjet arqyly jalpy ulttyq ǵylymi basymdyqqa sai bólinetin bolady.
Sonymen qatar prezident joldaý barysynda iri biznes ókilderi óńirlik ýniversitetterdiń ǵylymi qyzmetin qamqorlyq tanytsa degen usynysyn aitty.
Toqaevtyń aitýynsha, elimizdi ǵylymi-tehnologiialyq turǵydan damytatyn arnaýly baǵdarlama qajet. Onyń basty mindeti – ulttyq deńgeidegi naqty máselelerdi sheshýge ǵylymnyń áleýetin paidalaný.
Sondai-aq, memleket basshysy premer-ministr Asqar Maminge Qazaqstandaǵy joǵary oqý oryndarynyń diplomyn bizneske ainaldyrý máselesin sheshýdi jeke basshylyǵyna alýdy tapsyrdy.
"Ótken jyly diplomdy basyp shyǵaratyn joǵary oqý oryndaryn jabý týraly tapsyrma berdim. Bilim berý salasyn bizneske ainaldyrǵan keibir yqpaldy tulǵalardyń qarsylyǵy kesirinen jumys qiyn júrip jatyr. ", – dedi memleket basshysy.
Aitýynsha, bul másele tez arada bir sheshimin tabýy qajet.
Aita keteiik, jaqynda Qazaqstanda birqatar joǵary oqý ornynyń litsenziiasyn toqtatyldy. Bul isti Bilim jáne ǵylym ministrligi atqaryp jatyr. Sebebi ol oqý oyrndaryn qaita tekserý kezinde tártip buzýshylyqtar anyqtalǵan.
Tártip buzýshylyq anyqtalǵan oqý oryndary ishinde "Almaty" ýniversiteti, "Qainar" akademiiasy, Almatynyń ekonomika jáne statistika akademiiasy, Qazaq meditsinalyq úzdiksiz bilim berý ýniversiteti, Ábdimusa Qýatbekov atyndaǵy halyqtar dostyǵy ýniversiteti men "Silkway" halyqaralyq ýniverstiteti bar.
Resmi aqparatqa sáikes, Qazaq meditsinalyq úzdiksiz bilim berý ýniversiteti, "Almaty" ýniversiteti, Almatynyń ekonomika jáne statistika akademiiasy men Ábdimusa Qýatbekov atyndaǵy halyqtar dostyǵy ýniversitetiniń litsenziiasy tártip buzýshylyqtar joiylǵansha toqtatylady. Bul sheshimdi bilim men ǵylym salasynda sapany qamtamasyz etý komiteti sheshim qabyldady.
Sonymen qatar Taraz qalasyndaǵy Muhammed Haidar Dýlati atyndaǵy Taraz aimaqtyq ýniversitetiniń "Quqyq" (bakalavriat) baǵyty boiynsha litsenziiasy kúshin joidy.
Ministrliktiń habarlaýynsha, "Qainar" akademiiasy men "Silkway" halyqaralyq ýniverstitetine qatysty málimetter sotqa jiberildi. Sebebi bul eki oqý orny bilim men ǵylym salasynda sapany qamtamasyz etý komitetiniń terseris nátijesine shaǵym túsirgen. Oqý oryndaryna qatysty sheshim sot protsesi aiaqtalǵan soń qabyldanady.
Aita keteiik, bilim beretin oqý oryndarynyń litsenziiasynyń kúshi joiylsa, ýniversitet 2020-2021 oqý jylyna talapkerlerdi qabyldai almaidy.
