Memleket basshysy «Eni S.p.A.» kompaniiasynyń atqarýshy direktory Klaýdio Deskaltsidi qabyldady, dep habarlaidy Aqorda.
Kezdesý barysynda Qashaǵan jáne Qarashyǵanaq iri munai-gaz jobalarynyń júzege asyrylýy jónindegi jospar qarastyryldy.
Prezident Qasym-Jomart Toqaevqa jalǵasyp jatqan pandemiia jaǵdaiyna qaramastan, Qashaǵandaǵy qazirgi jobalardyń iske asyrylý qarqyny saqtalyp otyrǵany baiandaldy.
Klaýdio Deskaltsidiń aitýynsha, munai óndirý isin arttyrý jóninde birqatar mańyzdy investitsiialyq sheshim qabyldanǵan.
Konsortsiým Qashaǵan ken ornyn tolyqqandy igerýdiń tujyrymdamasyn ázirlep jatyr. Sondai-aq gaz óńdeý qýatyn kúsheitý jumystary jalǵasýda.
Memleket basshysy energetikalyq baǵyttaǵy investitsiialyq jobalardy odan ári júzege asyrýǵa Qazaqstannyń basa mán beretinin aitty.
Osy rette Prezident otandyq ónim úlesiniń joǵary bolýyn qamtamasyz etý qajettigine nazar aýdardy.
Budan bólek áńgime barysynda jer qoinaýyn igerý, geologiialyq barlaý jumystaryn júrgizý jáne jasyl energetika salasyndaǵy jobalardy iske asyrý máseleleri talqylandy.
