Foto: Tengrinews.kz
Prezident Qasym-Jomart Toqaev Nur-Sultandaǵy Geidar Áliev kóshesi ataýyn basqa nysanǵa aýystyrýdy tapsyrdy, - dep habarlaidy Tengrinews.kz agenttigi.
"Kezinde elordamyzdyń bir kóshesine kórnekti memleket qairatkeri, ázerbaijan halqynyń birtýar uly Geidar Álievtiń esimi berildi. Biraq qala damyp keledi, qazir búgingi pozitsiiadan qaraǵanda bul kóshe sonshalyqty áserli kórinbeidi. Sondyqtan men sheshim qabyldap, elorda ákimine elordamyzdyń úlken kósheleriniń nemese dańǵyldarynyń birine elimizde shyn júrekten qurmetteitin Geidar Álievtiń esimin berýdi usynýdy tapsyrdym. Iaǵni, kóshe ataýyn qolailyraq nysanǵa aýystyramyz. Bul ábden oryndy dep oilaimyn", - dedi Toqaev Bakýde Ázerbaijan prezidenti Ilham Álievpen ekijaqty kezdesýde.
Biraz kún buryn Kaspii teńizi jaǵasynda ornalasqan Ázerbaijannyń Sýmgaiyt qalasyndaǵy ortalyq kóshelerdiń birine qazaq aǵartýshysy, túrkitanýshy Ahmet Baitursynovtyń esimi berilgen bolatyn.
Sondai-aq, Prezident Ázerbaijan basshysyn Qazaqstanǵa kelýge shaqyrdy.
"Qurmetti Ilham Geidaruly, Qazaqstannyń Aziiadaǵy ózara is-qimyl jáne senim sharalary jónindegi keńesti shaqyrý jónindegi bastamasyn qoldaǵanyńyz úshin alǵysymdy bildirgim keledi. Qazannyń ortasynda elordamyzda sammit ótedi jáne árine, sizderdiń osy asa mańyzdy forýmǵa jeke qatysýlaryńyzdy kútemiz. Sizdiń osy forýmǵa qatysýyńyz jáne jumysyńyz qalaǵan nátijege qoljetkizý turǵysynan óte oń áser etedi", - dedi Toqaev.
