Qasym-Jomart Toqaev «Digital Bridge» halyqaralyq tehnologiialyq forýmyna qatysty, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy jyl saiyn ótetin «Digital Bridge 2022» halyqaralyq tehnologiialyq forýmyna qatysty. Is-sharaǵa Premer-Ministr, memlekettik organdardyń, biznes-qurylymdardyń jetekshileri, otandyq jáne halyqaralyq sarapshylar qatysty.
Prezidentke Astana Hub IT ekojúiesiniń qazirgi qyzmeti jáne Google for Startups kompaniiasymen birlesken baǵdarlamasynyń júzege asyrylýy jóninde baiandaldy, sondai-aq Alem baǵdarlamalaý mektebi men «Qazaqstan halqyna» qorynyń jobasy tanystyryldy.
Budan keiin Qasym-Jomart Toqaev startap alleiasyndaǵy árbir jobaǵa arnaiy toqtalyp, kompaniia ókilderiniń jetistikterin tyńdady. Olardyń birqatary tek Qazaqstan naryǵymen shektelmei, shetel naryǵyna da shyǵa bastaǵan.
Memleket basshysyna, atap aitqanda, aimaqtyq aviakompaniialarǵa arnalǵan Farel aviatsiialyq softtyń jańa býyny, Arbuz internet sýpermarketi, Zypl.ai jasandy intellekt zaýyty, UvU Ridesharing balalar men áielderge arnalǵan qaýipsiz tasymaldaý qyzmeti, Parqour aqyldy turaq qyzmeti, sloud-esepteýlerdi jeńildetetin FIBO Cloud qyzmeti jáne Intebix kriptobirjasy sekildi startaptar tanystyryldy.
Túrkiianyń Ónerkásip jáne tehnologiialar ministri Mustafa Varank pen Ózbekstannyń Aqparattyq tehnologiialar men kommýnikatsiialardy damytý ministri Sherzod Shermatov óz elderindegi tehnoparkterdiń Qazaqstanmen aradaǵy yntymaqtastyǵyna qatysty josparlary týraly aityp berdi.
Sonymen qatar Memleket basshysyna Blockchair, Playrix, EPAM, inDriver halyqaralyq IT-kompaniialaryn Qazaqstanǵa tartý jáne memlekettik qyzmetterdi tsifrlandyrý nátijeleri týraly baiandaldy. Atap aitqanda, Astana qalasynyń geoanalitikalyq platformasy, E-gov densaýlyq, Áleýmettik ámiian jáne otbasynyń tsifrlyq kartasy, Vet Mobile, E-Salyq Business, Jer telimderin satý jáne jyljymaityn múlikpen mámilelerdi tirkeý jónindegi onlain aýktsion siiaqty tsifrlyq sheshimder men KazNedra jer qoinaýyn paidalanýshylardyń biryńǵai platformasy jóninde sóz boldy.
