Foto: Aqorda
Memleket basshysy Óńirlik ekologiialyq sammittiń jumysyna belsene qatysqany úshin Feridýn Sinirlioǵlyǵa rizashylyǵyn bildirip, bul platforma Ortalyq Aziia men kórshi aimaqtarǵa ortaq ekologiialyq máselelerdi sheshý jolyn birlesip izdeýdi kózdeitinin aitty, dep habarlaidy Ult.kz.
Qasym-Jomart Toqaev pen Feridýn Sinirlioǵly ornyqty damý, klimattyń turaqtylyǵy, sý resýrstaryn tiimdi basqarý jáne ózara ekonomikalyq bailanysty keńeitý salalaryndaǵy yqpaldastyqty damytýǵa niet tanytty.
Prezident elimiz EQYU-men barlyq úsh ólshem boiynsha yntymaqtastyqty nyǵaitýǵa beiil ekenin rastady. Uiymmen aradaǵy seriktestik 2010 jyly ótken EQYU sammitiniń Astana deklaratsiiasy qaǵidattaryna negizdelgenin atap ótti.
Qasym-Jomart Toqaev adam quqyqtary, demokratiia men zań ústemdigi ulttyq basymdyq retinde qarastyrylatynyna nazar aýdardy.
Prezidenttiń aitýynsha, elimiz Ádiletti Qazaqstan qurý jolynda aýqymdy saiasi jáne institýtsionaldyq jańǵyrý baǵdarlamasyn iske asyryp jatyr.
Jaqynda ótken referendým men jańa Konstitýtsiianyń qabyldanýy elimizdiń saiasi júiesin jańartýdaǵy mańyzdy kezeń sanalady. Qolǵa alynǵan reformalar zań ústemdigin nyǵaitýdy, bilik institýttarynyń eseptiligin arttyrýdy jáne memleketti basqarýdyń ornyqty modelin qalyptastyrýdy kózdeidi.
Feridýn Sinirlioǵly Óńirlik ekologiialyq sammitke shaqyrǵany úshin Qasym-Jomart Toqaevqa alǵys aityp, Ortalyq Aziia men odan tysqary jerlerdegi klimat jáne ekologiia kún tártibin qalyptastyrýdaǵy Qazaqstannyń róline joǵary baǵa berdi. Sonymen qatar Bas hatshy elimizdiń Uiym jumysyna erekshe úles qosyp otyrǵanyn jetkizdi.
Qasym-Jomart Toqaev pen Feridýn Sinirlioǵly óńirlik jáne aimaqtyq kún tártibindegi ózekti máseleler jóninde pikir almasty.
