Prezident biznes-klimatty jaqsartý máselesine basa nazar aýdaryp otyr. Bul týraly QR Parlamenti Senatynyń depýtaty Lázzát Rysbekova málim etti, dep habarlaidy QazAqparat.
«COVID-19 indeti biznes salasyn qatty turalatyp ketti. Týrizm, qoǵamdyq tamaqtaný, saýda, qyzmet kórsetý jáne basqa da salalar úlken shyǵyndarǵa ushyrap otyr. Osyǵan orai Prezident halyqqa Joldaýynda biznesti aiaǵynan turǵyzý, biznes-klimatty jaqsartý jáne ony retteý men qadaǵalaý saiasatyn ózgertý máselelerin kóterdi. Memleket basshysy shaǵyn jáne orta biznes qiyn kezeńde basynan ótkerýde, olar pandemiianyń negizgi soqqysyn qabyldady dedi. Sondyqtan memleket óz tarapynan kásipkerlerdi qoldaý sharalaryn qolǵa aldy. Nátijesinde 700 myńnan astam kásipkerge salyq jeńildikteri berildi. Shaǵyn jáne orta biznes úshin eńbekaqy qoryna túsetin aýyrtpalyqty azaitý týraly tapsyrma berildi. Mundai jeńildik jyl sońyna deiin jalǵasatyn bolady», - dedi senator.
Sonymen qatar depýtat Prezident biznes-klimatty jaqsartý máselesine de nazar aýdarǵanyn eske saldy.
«Retteý men baqylaý saiasatynyń bazalyq qaǵidalarynyń ózgerýi qajet jáne bul azamattardyń densaýlyǵy men ekologiiany qorǵaý maqsatynda qoldanylsa ǵana oryndy bolatyndyǵyn» aitty. Búginde Resei Federatsiiasy «regýliatornaia gilotina» dep atalatyn saiasatty júrgizýde. Onyń mánisi biznestiń qyzmetine kedergi keltiretin zań normalaryn anyqtap, azaitý jáne sol arqyly biznestiń damýyna jol ashý bolyp sanalady. Meniń oiymsha, Qazaqstan da retteý men baqylaý baǵytyndaǵy zańnamalarǵa taldaý jasap, eskirgen normalardy joiýy qajet dep esepteimin. Mine Memleket basshysy da bizneske jasalǵan úshjyldyq moratoriidi paidalana otyryp, baqylaý tetikterin jańalaýdy tapsyrdy. Bul biznestiń ekinshi tynysyn ashady degen senim mol», - dedi Lázzát Rysbekova.
