QR Prezidenti Qasym-Jomart Toqaev birqatar memlekettiń basshylarymen telefon arqyly sóilesti, dep habarlaidy "Ult aqparat" Aqordanyń baspasóz qyzmetine silteme jasap.
Telefon arqyly áńgimelesý barysynda Qasym-Jomart Toqaev pen Ázerbaijan, Qyrǵyzstan, Tájikstan, Túrikmenstan, Ózbekstan Prezidentteri bir-birin qasietti Oraza ait merekesimen quttyqtady. Memleket basshysy baýyrlas halyqtarǵa jaqsylyq, baq-bereke tiledi.
Qyrǵyzstan Prezidenti Sadyr Japarovpen sóilesý kezinde qazaq-qyrǵyz strategiialyq seriktestigin damytýdyń ózekti máseleleri talqylandy. Sadyr Japarovtyń biylǵy 2-3 naýryz kúnderi Qazaqstanǵa jasaǵan memlekettik saparynyń qorytyndysy boiynsha qol jetkizilgen ýaǵdalastyqtardyń oryndalýyna erekshe nazar aýdaryldy.
Sonymen qatar taraptar Ortalyq Aziiadaǵy beibitshilik pen turaqtylyqty qamtamasyz etý isindegi tyǵyz yqpaldastyqty jalǵastyra berýge ýaǵdalasty. Qyrǵyz kóshbasshysy gýmanitarlyq kómek kórsetkeni úshin Qasym-Jomart Toqaevqa alǵys bildirdi.
Prezident Emomali Rahmonmen kelissóz barysynda Qasym-Jomart Toqaevtyń aldaǵy ýaqytta Tájikstanǵa jasaityn resmi saparynyń jai-japsary qarastyryldy.
Prezidentterdiń pikirinshe, Dýshanbede ótetin kelissózder qazaq-tájik yntymaqtastyǵynyń kókjiegin keńeitýge múmkindik beredi jáne óńirlik yntymaqtastyqty jandandyrý jónindegi jańa qadamdardy belgileidi.
Memleketaralyq bailanystardyń perspektivalary da Qazaqstan men Túrikmenstan Prezidentteri suhbatynyń negizgi taqyryby boldy.
Qasym-Jomart Toqaev pen Gýrbangýly Berdimuhamedov qazaq-túrikmen kópjosparly seriktestigin jańa ári sapaly deńgeige jetkizýge beiildi ekenin naqtylady. Memleket basshylarynyń pikirinshe, buǵan Qazaqstan Prezidentiniń aldaǵy ýaqytta Ashhabadqa jasaityn sapary aitarlyqtai septigin tigizedi.
Memleket basshysynyń Ózbekstan Prezidenti Shavkat Mirziioevpen áńgimelesýi kezinde dostyq, tatý kórshilik jáne strategiialyq seriktestikke negizdelgen qazaq-ózbek qatynastarynyń joǵary deńgeide ekeni aityldy.
Memleket basshylary saýda-ekonomikalyq, investitsiialyq jáne mádeni-gýmanitarlyq bailanystardyń damý qarqynyn saqtaý maqsatyndaǵy eki el úkimetteriniń yqpaldastyǵyn atap ótti. Qazaqstan men Ózbekstannyń kóshbasshylary Ortalyq Aziia óńirindegi ahýal men Aýǵanstan problemasy boiynsha pikir almasty.
Qasym-Jomart Toqaev Shavkat Mirziioevti biyl Qazaqstanǵa saparmen kelýge shaqyrdy.
Ázerbaijan Prezidenti Ilham Álievpen áńgimelesý kezinde qazaq-ázerbaijan yntymaqtastyǵynyń barlyq baǵytyna tyń serpin berý úshin áleýetti barynsha paidalanýdyń mańyzdylyǵy aityldy.
Ózara saýda-sattyqty ulǵaitýǵa, ekonomikanyń negizgi salalaryndaǵy birlesken jobalardy iske asyrýǵa baǵyttalǵan sharalar qabyldaý týraly ýaǵdalastyqqa qol jetkizildi. Qasym-Jomart Toqaev Túrki keńesindegi Qazaqstannyń bastamalaryna qoldaý kórsetkeni úshin ázerbaijandyq áriptesine rizashylyǵyn bildirdi.
