Qazaqstan Prezidenti Qasym-Jomart Toqaev Bilim jáne ǵylym ministri Kúlásh Shámshidinovany qabyldady, dep habarlaidy "Ult aqparat" Aqordaǵa silteme jasap.
Memleket basshysyna bilim berýdi jáne ǵylymdy damytý Memlekettik baǵdarlamasynyń júzege asyrylý barysy baiandaldy.
Qasym-Jomart Toqaev úsh aýysymda oqytýdy joiý, jańa mektepter salý jáne úsh tilde bilim berýge birtindep ótý jumystaryn jalǵastyrý mańyzdy mindet ekenin aitty.
K. Shámshidinova tehnikalyq jáne kásibi bilim berý isiniń jaǵdaiy jáne biznes pen oqý oryndarynyń arasyndaǵy ózara is-qimyldardy jolǵa qoiý sharalary jóninde esep berdi. Kezdesý barysynda joǵary bilimniń sapasyn arttyrýǵa jáne JOO túlekteriniń eńbek naryǵyndaǵy suranysqa sai bolýyna erekshe nazar aýdaryldy.
Memleket basshysy mektep muǵalimderi men JOO oqytýshylaryn artyq esep berýlerden aryltyp, pedagogtardyń mártebesin kóterýge, ǵalymdardy memleket tarapynan qoldaýǵa, birinshi kezekte memlekettik tilde zertteýler júrgizetin gýmanitarlyq baǵyttaǵy ǵalymdarǵa basymdyq berýge baǵyttalǵan naqty sharalar qabyldaýdy tapsyrdy.
Qazaqstan Prezidenti kezdesý sońynda bilim berý júiesiniń máseleleri budan bylai da óziniń jiti nazarynda bolatynyn aitty.
