Foto: Aqorda
Memleket basshysy «Qazaqstan – akademiialyq bilim aimaǵy» strategiialyq seriktester forýmynda sóz sóiledi, dep habarlaidy Ult.kz.
Prezident bilim jáne ǵylymdy eshqandai shekara talǵamaityn, barlyq elge ortaq strategiialyq mańyzy airyqsha sala retinde atap, búgingi forým sonyń aiqyn dáleli ekenine nazar aýdardy.
"Bul – shyn máninde óte mańyzdy jiyn, jahandyq bilim men ǵylymnyń damýy týraly asa qundy oi-pikirler aitylatyn, boljamdar jasalatyn biregei alań. Osyǵan orai kesheden beri álemdegi jetekshi joǵary oqý oryndarynyń basshylary jáne ókilderi Astanada bas qosyp, pikir almasyp jatyr. Halyqaralyq deńgeidegi ǵalymdar men sarapshylar elordamyzda mańyzdy máselelerdi talqylaýda. Búgin de akademiialyq bilim álemindegi bedeldi joǵary oqý oryndarynyń jetekshileri tereń maǵynaly oilaryn ortaǵa saldy. Barshańyzǵa shynaiy rizashylyǵymdy bildiremin", – dedi Qasym-Jomart Toqaev.
Prezidenttiń pikirinshe, bilim men ǵylym – álemdi ózgerte alatyn eń basty kúsh, al ýniversitet – ozyq oilar men jańa ideialardyń ordasy, ǵylymi izdenis ortasy.
"Qazir adamzat túbegeili ózgerister dáýirine qadam basqan kezde bilim ordalary zaman talabyna sai ozyq bolýǵa tiis. Onsyz eshqandai damý da, órkendeý de bolmaityny anyq. Qazaqstan bilim-ǵylym júiesin damytýǵa airyqsha mán berip otyr. 2019 jyldan beri osy salaǵa bólinetin qarjy úsh ese ulǵaidy. Elimizde joǵary oqý oryndarynyń derbestigi artyp keledi, zertteý ýniversitetteri kóbeiýde. «Ǵylym jáne tehnologiialyq saiasat týraly» jańa zań qabyldandy. Prezident janynan Ǵylym jáne tehnologiialar jónindegi ulttyq keńes quryldy. Memleket ǵalymdarǵa, ásirese, jas zertteýshilerge barynsha qoldaý kórsetýde. Joǵary bilimniń barsha azamatqa birdei qoljetimdi bolýy – óte mańyzdy mindet", – dedi Memleket basshysy.
