فوتو: اقوردا
مەملەكەت باسشىسى «قازاقستان – اكادەمييالىق بٸلٸم ايماعى» ستراتەگييالىق سەرٸكتەستەر فورۋمىندا سٶز سٶيلەدٸ, دەپ حابارلايدى Ult.kz.
پرەزيدەنت بٸلٸم جەنە عىلىمدى ەشقانداي شەكارا تالعامايتىن, بارلىق ەلگە ورتاق ستراتەگييالىق ماڭىزى ايرىقشا سالا رەتٸندە اتاپ, بٷگٸنگٸ فورۋم سونىڭ ايقىن دەلەلٸ ەكەنٸنە نازار اۋداردى.
"بۇل – شىن مەنٸندە ٶتە ماڭىزدى جيىن, جاھاندىق بٸلٸم مەن عىلىمنىڭ دامۋى تۋرالى اسا قۇندى وي-پٸكٸرلەر ايتىلاتىن, بولجامدار جاسالاتىن بٸرەگەي الاڭ. وسىعان وراي كەشەدەن بەرٸ ەلەمدەگٸ جەتەكشٸ جوعارى وقۋ ورىندارىنىڭ باسشىلارى جەنە ٶكٸلدەرٸ استانادا باس قوسىپ, پٸكٸر الماسىپ جاتىر. حالىقارالىق دەڭگەيدەگٸ عالىمدار مەن ساراپشىلار ەلوردامىزدا ماڭىزدى مەسەلەلەردٸ تالقىلاۋدا. بٷگٸن دە اكادەمييالىق بٸلٸم ەلەمٸندەگٸ بەدەلدٸ جوعارى وقۋ ورىندارىنىڭ جەتەكشٸلەرٸ تەرەڭ ماعىنالى ويلارىن ورتاعا سالدى. بارشاڭىزعا شىنايى ريزاشىلىعىمدى بٸلدٸرەمٸن", – دەدٸ قاسىم-جومارت توقاەۆ.
پرەزيدەنتتٸڭ پٸكٸرٸنشە, بٸلٸم مەن عىلىم – ەلەمدٸ ٶزگەرتە الاتىن ەڭ باستى كٷش, ال ۋنيۆەرسيتەت – وزىق ويلار مەن جاڭا يدەيالاردىڭ ورداسى, عىلىمي ٸزدەنٸس ورتاسى.
"قازٸر ادامزات تٷبەگەيلٸ ٶزگەرٸستەر دەۋٸرٸنە قادام باسقان كەزدە بٸلٸم وردالارى زامان تالابىنا ساي وزىق بولۋعا تيٸس. ونسىز ەشقانداي دامۋ دا, ٶركەندەۋ دە بولمايتىنى انىق. قازاقستان بٸلٸم-عىلىم جٷيەسٸن دامىتۋعا ايرىقشا مەن بەرٸپ وتىر. 2019 جىلدان بەرٸ وسى سالاعا بٶلٸنەتٸن قارجى ٷش ەسە ۇلعايدى. ەلٸمٸزدە جوعارى وقۋ ورىندارىنىڭ دەربەستٸگٸ ارتىپ كەلەدٸ, زەرتتەۋ ۋنيۆەرسيتەتتەرٸ كٶبەيۋدە. «عىلىم جەنە تەحنولوگييالىق ساياسات تۋرالى» جاڭا زاڭ قابىلداندى. پرەزيدەنت جانىنان عىلىم جەنە تەحنولوگييالار جٶنٸندەگٸ ۇلتتىق كەڭەس قۇرىلدى. مەملەكەت عالىمدارعا, ەسٸرەسە, جاس زەرتتەۋشٸلەرگە بارىنشا قولداۋ كٶرسەتۋدە. جوعارى بٸلٸمنٸڭ بارشا ازاماتقا بٸردەي قولجەتٸمدٸ بولۋى – ٶتە ماڭىزدى مٸندەت", – دەدٸ مەملەكەت باسشىسى.
