Memleket basshysy Aqtóbe oblysynyń ákimi Berdibek Saparbaevty qabyldady, - dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan Prezidentine 2016 jyldyń qorytyndysy boiynsha Aqtóbe oblysynyń áleýmettik-ekonomikalyq damýy jóninde baiandaldy.
Elbasy Aqtóbe oblysy perspektivaly ónerkásiptik óńir bolyp sanalatynyn, degenmen elimizdiń ishki jalpy ónimine qosatyn oblystyń ekonomikalyq úlesi jyldan jylǵa azaiyp kele jatqanyn atap ótti.
"Mundai úrdis 2012 jyldan beri jalǵasýda. Biz onyń sebepterin anyqtap, tiisti sharalar qabyldaýymyz kerek. Eger de aýyl sharýashylyǵy eksportyn arttyramyz desek, qaita óńdeý óndirisi nysandaryn damytýǵa mán berý qajet", - dedi Nursultan Nazarbaev.
Memleket basshysy shaǵyn jáne orta biznesti damytyp, onyń óńir ekonomikasyndaǵy úlesin 50 paiyzǵa jetkizýdiń mańyzdylyǵyna nazar aýdardy.
Sondai-aq, Qazaqstan Prezidenti oblystyń áleýmettik saladaǵy jumysynyń basymdyǵy bar baǵyttaryn belgilep berdi. Sonyń qatarynda balabaqsha sanyn kóbeitý, apatty jaǵdaida turǵan mektepterge jóndeý jumystaryn júrgizý, buǵan qosa birqatar bilim berý mekemelerindegi úshinshi aýysymdy joiý máseleleri bar.
Aqtóbe oblysynyń ákimi óńirdiń ekonomikalyq jaǵdaiyn jaqsartý, sonyń ishinde ónerkásip sektoryn damytý, aýyl sharýashylyǵyna investitsiia tartý jáne halyqty jumyspen qamtý maqsatymen júrgizilgen jumystar týraly aityp berdi.
"Jyl qorytyndysy boiynsha oblystyń áleýmettik-ekonomikalyq damýynyń negizgi kórsetkishteri óskeni baiqalady. Eń bastysy - jumyssyzdyqtyń kóbeiýine jol bergen joqpyz. Memlekettik baǵdarlamalardyń der kezinde júzege asyrylýy nátijesinde byltyr 16 myń jańa jumys orny ashyldy", - dedi Berdibek Saparbaev.
Kezdesý sońynda Elbasy birqatar naqty tapsyrma berdi.
.jpeg)