Foto: Aqorda
Memleket basshysynyń Batys Qazaqstan oblysyna jumys sapary qarǵyn sý basqan aýmaqtardy tikushaqpen aralap kórýden bastaldy. Aqordanyń baspasóz qyzmeti málimdedi.
Qasym-Jomart Toqaev Terekti, Syrym jáne Qaratóbe aýdandaryndaǵy qalyptasqan jaǵdaimen tanysty.
«Oblys ákimi Nariman Tóreǵaliev Prezidentke búginde 6 aýdan men Oral qalasyn sý basqanyn baiandady. Qarǵyn sý 552 turǵyn úige, 427 saiajai telimine ziian keltirgen. Óńir basshysynyń aitýynsha, sý tasqynyna qarsy sharalarǵa 1911 adam, 332 tehnika, 101 motopompa, 1 tikushaq jumyldyrylǵan. Sonymen qatar qutqarý jumystaryna Almaty jáne Mańǵystaý oblystarynyń qutqarýshylary atsalysyp jatyr. Qarǵyn sý basqan aýmaqtardan 7 myńǵa jýyq turǵyn kóshirilgen, jedel-evakýatsiialaý pýnktteri qurylǵan. Zardap shekkenderge birjolǵy materialdyq kómek kórsetý úshin jergilikti biýdjet esebinen 63 million teńge qarjy bólindi. Sý aidaý, nysandardyń jan-jaǵyn topyraqpen qorshaý jáne sý júretin qubyrlardy keńeitý jumystary júrgizilip jatyr» - delingen habarlamada.
Eske sala keteiik, búgin memleket basshysy Qasym-Jomart Toqaev Batys Qazaqstan oblysyna jumys saparymen bardy.
Oǵan deiin Prezident Qasym-Jomart Toqaev elimizdiń birqatar óńirinde bolǵan sý tasqyny saldarynan týyndaǵan tótenshe jaǵdaiǵa bailanysty shuǵyl keńes ótkizdi.
Memleket basshysy jaǵdaidy qalypqa keltirý úshin shuǵyl sharalar qabyldaýmen qatar, júieli jumys qajet ekenin atap ótti.
Sondai-aq Prezident Qasym-Jomart Toqaevtyń tóraǵalyǵymen Sý tasqynyna qarsy sharalardy úilestirý jáne qarǵyn sý júrý kezeńiniń saldaryn joiý jónindegi respýblikalyq shtabtyń otyrysy ótti.
